கோமாளிகள் படத்தில் ‘செல்லம்மணி’யாக  நடித்த சுப்புலட்சுமி காசிநாதன்  காலமானார்

இலங்கைத் தமிழ் வானொலி நேயர்களால் ‘கோமாளிகள்’ நகைச்சுவை நாடகத்தில் அப்புக்குட்டியின் மனைவி,  செல்லம்மணியாக யாழ்ப்பாணத் தமிழ்  பேசி, நடித்த பிரபல  நடிகை சுப்புலட்சுமி காசிநாதன், செவ்வாய்க்கிழமை கனடாவின் டொராண்டோவில் உள்ள ஸ்கார்பரோ பொது வைத்தியசாலையில் காலமானார். அவருக்கு வயது 84.

மரணமடைவதற்கு முதல் நாள் அவர் வைத்தியசாலையில் அனுமதிக்கப்பட்டிருந்தார். செவ்வாய்க்கிழமை உள்ளூர் நேரப்படி மாலை சுமார் 4.35 மணியளவில், தனது இரு மகள்களும் ஏனைய உறவினர்களும் அருகில் இருக்கும்போது அவர் உயிரிழந்ததாக குடும்பத்தினர் தெரிவித்தனர்.

இலங்கையில் வானொலி நாடகங்கள், மேடை நாடகங்கள் மற்றும் திரைப்படங்களில் நடித்துவந்த சுப்புலட்சுமி காசிநாதன், பின்னர் கனடாவிலும் திரைப்படங்கள் மற்றும் தொலைக்காட்சி நிகழ்ச்சிகளில் பங்கேற்றார்.

1994ஆம் ஆண்டு முதன்முதலில் வெளியிடப்பட்டு, தற்போது நூலகம் டிஜிட்டல் ஆவணக் காப்பகத்தில் பாதுகாக்கப்படும் ‘இலங்கைத் தமிழ்ச் சினிமாவின் கதை’ என்ற நூலில், எழுத்தாளர்,  தம்பியையா தேவதாஸ் அவர்கள், சுப்புலட்சுமி காசிநாதனை இலங்கையின் தமிழ் வானொலி நாடக நடிகைகளில் முதன்மையானவர் என்று குறிப்பிட்டுள்ளார்.

அவருக்குப் பெரும் புகழைத் தேடித்தந்த தொடர், 1974ஆம் ஆண்டு கொழும்பு டி.எஸ். சேனநாயக்க கல்லூரியில் நடிகரும் எழுத்தாளருமான எஸ். ராமதாஸ் மேடையேற்றிய 30 நிமிட நகைச்சுவை நாடகமாகவே முதலில் உருவானது.

அப்போது மக்கள் வங்கிக்கான வானொலி நிகழ்ச்சியொன்றைத் தயாரித்துக்கொண்டிருந்த இலங்கை வானொலிக் கலைஞர் சில்லையூர் செல்வராசன், அந்த நாடகத்தைப் பார்த்துவிட்டு, அதனை விரிவுபடுத்தி வானொலி நாடகமாகத் தயாரிக்குமாறு ராமதாஸிடம் கேட்டுக்கொண்டார்.

இதையடுத்து உருவான ‘கோமாளிகளின் கும்மாளம்’ என்ற வானொலி நாடகம், 90 வாரங்கள் தொடர்ந்து ஒவ்வொரு ஞாயிற்றுக்கிழமையும் மாலை 4 மணிக்கு ஒலிபரப்பானது.

இலங்கையின் நான்கு வெவ்வேறு சமூகங்களைச் சேர்ந்த நான்கு ஆண்களை மையமாகக் கொண்டு இந்த நகைச்சுவைத் தொடர் அமைந்திருந்தது. சிங்களவரான உபாலி, இலங்கைத் தமிழரான அப்புக்குட்டி, கொழும்பு முஸ்லிமான மரிக்கார், இந்தியத் தமிழரான ஐயர் ஆகிய நான்கு பாத்திரங்களே அவை.

பிராமணரான எஸ். ராமதாஸ், கொழும்பு முஸ்லிம் பேச்சுவழக்கில் மரிக்கார் பாத்திரத்தில் நடித்தார். முஸ்லிமான வானொலி பிரபல அறிவிப்பாளர் பி.எச். அப்துல் ஹமீத், ஐயர் பாத்திரத்தில் நடித்தார். அப்புக்குட்டியாக டி. ராஜகோபால் நடித்தார். அவரது மனைவி செல்லம்மணியாக சுப்புலட்சுமி காசிநாதன் நடித்தார். இருவரும் யாழ்ப்பாணத் தமிழில் உரையாடினர்.

பல ஆண்டுகளுக்குப் பின்னரும் வானொலி நேயர்கள் அவரை “செல்லம்மணி” என்ற பாத்திரப் பெயராலேயே அழைத்து வந்தனர்.

வாரந்தோறும் இந்த வானொலி நாடகத்தைக் கேட்டுவந்த வர்த்தகரான எம். மொஹமட், அதன் திரைப்பட வடிவத்தைத் தயாரிப்பதற்கான நிதியை வழங்கினார்.

ராமதாஸின் திரைக்கதையில் எஸ். ராமநாதன் இயக்கிய ‘கோமாளிகள்’ திரைப்படத்தில், வெவ்வேறு சமூகங்களைச் சேர்ந்த குடும்பங்கள் “ஏலத்தில் விடப்படவிருந்த ஒரு பெரிய வீட்டில்” ஒன்றாக வாழ்கின்றன. தனிகாசலம் என்பவர் அந்த வீட்டை வாங்கிய பின்னர், அங்கு வசிக்கும் குடும்பங்களைத் தொடர்ந்து தங்க அனுமதிக்கிறார். அதேவேளை, அந்த வீட்டில் மிகவும் ஒழுக்கமாகவும் சிறந்த முறையிலும் நடந்துகொள்ளும் குடியிருப்பாளருக்கே இறுதியில் வீட்டை வழங்கப்போவதாக அறிவிக்கிறார்.

இந்தத் திரைப்படத்திலும் சுப்புலட்சுமி காசிநாதன் மீண்டும் செல்லம்மணி பாத்திரத்தில் நடித்தார்.

45 நாட்களில் படமாக்கப்பட்ட இந்தத் திரைப்படத்துக்கு திரையரங்குகளில் வாய்ப்பளிப்பதற்காக, தேசிய திரைப்படக் கூட்டுத்தாபனம் தென்னிந்தியாவின் புதிய திரைப்படங்களின் வெளியீடுகளைத் தாமதப்படுத்தியது என்று சொல்லப்படுவதுண்டு.

1976ஆம் ஆண்டு ஒக்டோபர் 22ஆம் திகதி ஆறு நகரங்களில் இந்தத் திரைப்படம் வெளியிடப்பட்டது. கொழும்பு மத்திய பகுதியில் உள்ள செல்லமஹால் திரையரங்கில் 76 நாட்களும், தென் கொழும்பிலுள்ள பிளாசா திரையரங்கில் 55 நாட்களும், யாழ்ப்பாணத்திலுள்ள வின்ட்சர் திரையரங்கில் 51 நாட்களும் திரையிடப்பட்டது.

யாழ்ப்பாணத்திலிருந்து வெளிவந்த ‘மல்லிகை’ இதழில் திரைப்படத்தை விமர்சனம் செய்த அதன் ஆசிரியர் டொமினிக் ஜீவா, யாழ்ப்பாணத் திரையரங்கில் திரைப்படத்தைப் பார்ப்பதற்காக வந்த பலர் நுழைவுச்சீட்டுகள் கிடைக்காததால் ஏமாற்றத்துடன் வீடு திரும்பியதாகக் குறிப்பிட்டார்.

இலங்கையிலும் வெற்றிகரமாகத் தமிழ் திரைப்படங்களைத் தயாரிக்க முடியும் என்ற நம்பிக்கையை ‘கோமாளிகள்’ திரைப்படத்தின் வர்த்தக வெற்றி தயாரிப்பாளர்களுக்கு ஏற்படுத்தியதாக தம்பியையா  தேவதாஸ் தனது நூலில் குறிப்பிட்டுள்ளார்.

வானொலி நாடகத்திலிருந்து திரையுலகம் வரை:

சுப்புலட்சுமி காசிநாதன் 1942ஆம் ஆண்டு நவம்பர் 1ஆம் திகதி பிறந்தார்.

இலங்கை வானொலியில் நாடகக் கலைஞராகத் தெரிவுசெய்யப்பட்ட அவர், பிபிசியில் பயிற்சிபெற்ற தயாரிப்பாளரும் ‘சானா’ என்று அழைக்கப்பட்டவருமான எஸ். சண்முகநாதனிடம் நாடகக் கலையைக் கற்றுக்கொண்டார்.

அதனைத் தொடர்ந்து கே.எம். வாசகர் மற்றும் அவருக்குப் பின்னர் நாடகத் தயாரிப்பாளராகப் பொறுப்பேற்ற பி. விக்னேஸ்வரன் ஆகியோர் தயாரித்த பல நாடகங்களில் நடித்தார்.

தமிழ் சேவையில் யாழ்ப்பாணத் தமிழில் நாடகங்கள் தயாரிக்கத் தொடங்கியபோது, அவற்றில் நடித்த கலைஞர்களில் சுப்புலட்சுமியும் ஒருவராக இருந்தார். கே. மார்க்கண்டன், எஸ்.எஸ். கணேசப்பிள்ளை, எஸ்.கே. தர்மலிங்கம் ஆகியோரும் அவருடன் இணைந்து நடித்தனர்.

மேடை நாடகங்களில் சிறந்த நடிகைக்கான விருதையும் அவர் பெற்றிருந்தார். கே.எம். வாசகர் எழுதி இயக்கிய ‘சுமதி’ நாடகத்தில் கதாநாயகியாக நடித்ததற்காக தினகரன் நாடக விழாவில் சிறந்த நடிகைக்கான விருது அவருக்கு வழங்கப்பட்டது. அந்த நாடகம் முதலாவது பரிசையும் பெற்றது.

‘பார்வதி பரமசிவம்’ என்ற நகைச்சுவை நாடகமும், ‘சாணக்கியன்’ என்ற வரலாற்று நாடகமும் அவரது குறிப்பிடத்தக்க மேடைப் படைப்புகளாகும்.

நடிகையாக மட்டுமன்றி சிறந்த பாடகியாகவும் விளங்கிய அவர், நடிகமணி வி.வி. வைரமுத்து மேடையேற்றிய ‘அரிச்சந்திர மயான காண்டம்’ என்ற இசை நாடகத்தில், அரசன் அரிச்சந்திரனின் மனைவி சந்திரமதியாக நடித்தார். இலங்கை முழுவதும் 3,000 தடவைகளுக்கும் அதிகமாக மேடையேற்றப்பட்ட இந்த நாடகத்தில், அரிச்சந்திரனாக வி.வி. வைரமுத்து நடித்திருந்தார்.

அவரது இசை நாடகங்களிலும் சுப்புலட்சுமி பாடி நடித்ததுடன், வானொலியிலும் அவற்றில் பங்கேற்றார்.

திரைப்படத் துறையில், தனது கணவரும் நடிகருமான ராமேஸ்வரம் காசிநாதனுடன் இணைந்து ‘சுமதி எங்கே’ என்ற திரைப்படத்தில் நடித்தார்.

தயாரிப்பாளர் எச்.சி. சந்திரவன்சா தயாரித்த சிங்களத் திரைப்படமான ‘வனகத கெல்ல’ என்ற படத்தில், ராஜம் புஷ்பவனம் எழுதிய தமிழ்க் காட்சிகளை இணைத்து ‘சுமதி எங்கே’ உருவாக்கப்பட்டது. நிதிப் பிரச்சினைகள் காரணமாக ஆறு ஆண்டுகள் வரை அதன் தயாரிப்பு நீடித்தது. ‘கோமாளிகள்’ திரைப்படம் வெளியான ஒரு மாதத்துக்குப் பின்னர், 1976 நவம்பரில் இப்படம் திரையிடப்பட்டது.

ஏ. ரகுநாதனின் கதையை அடிப்படையாகக் கொண்டு வில்பிரட் சில்வா இயக்கிய ‘தெய்வம் தந்த வீடு’ என்ற சினிமாஸ்கோப் திரைப்படத்திலும் அவர் நடித்தார். பெரும்பாலும் யாழ்ப்பாணத்தில் படமாக்கப்பட்ட இத்திரைப்படம் 1978ஆம் ஆண்டு ஜூலை 14ஆம் திகதி வெளியானது.

தம்பியையா  தேவதாஸ் தனது நூலில் இந்தத் திரைப்படம் தொடர்பாக வெளியான இரண்டு விமர்சனங்களையும் மீள்பதிவு செய்துள்ளார். ‘சிந்தாமணி’ பத்திரிகை, சுப்புலட்சுமியின் நடிப்பு “நன்றாகவும் உள்ளது” என்று குறிப்பிட்டிருந்தது. யாழ்ப்பாணத்திலிருந்து வெளிவந்த ‘ஈழநாடு’ பத்திரிகையின் விமர்சகர், சுப்புலட்சுமியும் நடிகை சந்திரகலாவும் சோகக் காட்சிகளில் சிறப்பாகத் திகழ்ந்ததாக எழுதியிருந்தார்.

1980ஆம் ஆண்டு யாழ்ப்பாணத்தில் இயங்கிய ‘பெஸ்டன்’ என்ற ஒலிபரப்புச் சேவைக்காக, சுப்புலட்சுமியும் டி. ராஜகோபாலும் செல்லம்மணி, அப்புக்குட்டி ஆகிய பாத்திரங்களாக இணைந்து விளம்பரங்களைப் பதிவு செய்தனர். அந்த விளம்பரங்கள் நேயர்கள் மத்தியில் பெரும் வரவேற்பைப் பெற்றதாக, அவற்றைப் பதிவு செய்த ஒலிபரப்பாளர் இவ்வாரத்தில் வெளியிட்ட அஞ்சலிக் குறிப்பில் தெரிவித்துள்ளார்.

கனடாவில் கலைப்பயணம்..

பின்னர் சுப்புலட்சுமி காசிநாதன் கனடாவுக்குக் குடிபெயர்ந்தார்.

அங்கு தமிழ்-கனடியத் திரைப்படங்களான ‘வசந்த கானம்’, ‘எங்கோ தொலைவில்’, ‘கனவுகள்’, ‘மெதுவாக உன்னைத் தொட்டு’, ‘தமிழிச்சி’ ஆகியவற்றில் நடித்தார்.

‘புதியதோர் வீடு’ என்ற கவிதை நாடகத்திலும் பங்கேற்றார். ‘நாற்சார வீட்டில்’, ‘தி.ஒய். லிங்கம் ஷோ’ ஆகிய தொலைக்காட்சி நிகழ்ச்சிகளிலும் தோன்றினார்.

டொராண்டோவில் முன்னாள் இலங்கை வானொலிக் கலைஞர்களான கே.எஸ். பாலச்சந்திரன், பி. விக்னேஸ்வரன், வி.என். மதியழகன், சொக்கெல்லோ சண்முகம் உள்ளிட்ட பலருடன் மீண்டும் இணைந்து பணியாற்றினார்.

அவரது கணவர் சுமார் எட்டு ஆண்டுகளுக்கு முன்னர் காலமானார்.

2005ஆம் ஆண்டு, சானாவின் மறைவின் 25ஆவது ஆண்டு நினைவாக அவரது குடும்பத்தினர் வெளியிட்ட அஞ்சலி நூலுக்கு, வெளிநாட்டில் இருந்தபோதும் சுப்புலட்சுமி தனது பங்களிப்பை வழங்கியிருந்தார்.

2022ஆம் ஆண்டு உடல்நலக் குறைவு இருந்தபோதிலும், கனடாவில் நடைபெற்ற கோடைகால விழாவொன்றில் அவர் கலந்துகொண்டார். அங்கு ‘கோமாளிகள்’ நாடகத்திலும் திரைப்படத்திலும் தன்னுடன் இணைந்து நடித்த சக கலைஞரான அப்துல் ஹமீத் தனது நினைவுக் குறிப்புகளை வெளியிடும் நிகழ்வில் பங்கேற்பதற்காகவே அவர் அங்கு சென்றிருந்தார்.

சுப்புலட்சுமி காசிநாதனுக்கு இரு மகள்கள் உள்ளனர்.

(நன்றி: ஜஃப்னா மொனிட்டர்)