வரி வருவாய் நிர்வாகத்தை அரசாங்கம் முழுமையாக மறுசீரமைக்க வேண்டும் – ஐ.எம்.எப்.

இலங்கையின் வரி வருவாயை மொத்த உள்நாட்டு உற்பத்தியில் (GDP) 2021ஆம் ஆண்டின் 7.3 சதவீதத்திலிருந்து 15.4 சதவீதமாக இரட்டிப்பாக்கிய வரி உயர்வுகளின் பலன்கள் ஏற்கனவே பெருமளவில் எட்டப்பட்டுவிட்ட நிலையில், அந்த வருவாய் வளர்ச்சியைத் தொடர்ந்து தக்கவைத்துக் கொள்வதற்கு அரசாங்கம் தனது வரி நிர்வாக முறையை முழுமையாக மறுசீரமைக்க வேண்டும் என்று சர்வதேச நாணய நிதியம் (IMF) தெரிவித்துள்ளது.

நெருக்கடி நிலைமைகளுக்குப் பதிலளிக்கும் தற்காலிக அணுகுமுறையிலிருந்து விலகி, நவீனமான, இடர் அடிப்படையிலான (Risk-based), டிஜிட்டல் தொழில்நுட்பத்தைப் பயன்படுத்தும் வரி நிர்வாக முறைக்கு இலங்கை மாற வேண்டும் என்றும் அது வலியுறுத்தியுள்ளது.

வரி விகிதங்களை மேலும் அதிகரிப்பதன் மூலம் அல்லாமல், வரி இணக்கம் (Tax Compliance), தரவுப் பயன்பாடு மற்றும் சட்ட அமுலாக்கம் ஆகியவற்றின் மூலமே அடுத்த கட்ட வருவாய் திரட்டல் சாத்தியமாகும் என்றும் ஐ.எம்.எப். கூறியுள்ளது.

2026 ஒக்டோபர் 30ஆம் திகதி நிதி, திட்டமிடல் மற்றும் பொருளாதார அபிவிருத்தி அமைச்சினால் வெளியிடப்பட்ட சர்வதேச நாணய நிதியத்தின் நிதி விவகாரத் திணைக்களத்தின் (Fiscal Affairs Department – FAD) வருவாய் நிர்வாகம் தொடர்பான மதிப்பீட்டு அறிக்கையில் இந்த விடயங்கள் தெரிவிக்கப்பட்டுள்ளன.

விரிவாக்கப்பட்ட நிதி வசதித் திட்டத்தின் (Extended Fund Facility – EFF) கீழான சீர்திருத்த உறுதிப்பாடான கட்டமைப்பு இலக்கை (Structural Benchmark) நிறைவேற்றும் வகையில் இந்த அறிக்கை வெளியிடப்பட்டுள்ளது.

2026 ஜூன் 24ஆம் திகதி முதல் ஜூலை 7ஆம் திகதி வரை கொழும்பில் மேற்கொள்ளப்பட்ட ஆய்வுப் பணியை அடிப்படையாகக் கொண்டு இந்த அறிக்கை தயாரிக்கப்பட்டுள்ளது. ஆண்ட்ரூ கசோரா ஒகெல்லோ (Andrew Kazora Okello) தலைமையிலான குழுவினர் இந்த ஆய்வை மேற்கொண்டனர்.

அரசாங்கத்திற்குச் சொந்தமான மத்தியகால வருவாய் உபாயத் திட்டத்தின் (Medium-Term Revenue Strategy – MTRS) வருவாய் நிர்வாகம் தொடர்பான முக்கிய அம்சங்களையும் இந்த அறிக்கை முன்வைக்கிறது.

2021ஆம் ஆண்டில் மொத்த உள்நாட்டு உற்பத்தியில் 7.3 சதவீதமாக இருந்த வரி வருவாய், பின்னர் 15.4 சதவீதமாக அதிகரித்தது. இந்த மீட்சிக்கு பெறுமதி சேர் வரி (VAT) முக்கிய பங்களிப்பை வழங்கியது. மொத்த உள்நாட்டு உற்பத்தியில் 1.8 சதவீதமாக இருந்த பெறுமதி சேர் வரி வருவாய் 5.3 சதவீதமாக உயர்ந்தது. இது மொத்த வருவாய் அதிகரிப்பில் சுமார் பாதிப் பங்கைக் கொண்டிருந்தது.

அதேவேளை, வருமான வரி வருவாய் 1.9 சதவீதத்திலிருந்து 3.5 சதவீதமாக அதிகரித்தது.

எனினும், பலவீனமான நிறுவனக் கட்டமைப்பின் பின்னணியிலும், வரி கணிப்பீட்டில்  இன்னமும் பாரிய குறைபாடுகள் காணப்படும் நிலையிலுமே இந்த வருவாய் அதிகரிப்பு ஏற்பட்டுள்ளதாக ஐ.எம்.எப். சுட்டிக்காட்டியுள்ளது.

உள்நாட்டு இறைவரித் திணைக்களம் (IRD), இலங்கை சுங்கத் திணைக்களம் (SLC) மற்றும் இலங்கை கலால் திணைக்களம் (SLE) ஆகியவற்றில் இடர் அடிப்படையிலான நிர்வாக அணுகுமுறைகள் அறிமுகப்படுத்தப்பட்டுள்ள போதிலும், அவை அன்றாட நடவடிக்கைகளில் இன்னமும் சீரான முறையில் நடைமுறைப்படுத்தப்படவில்லை என்றும் அறிக்கை கூறுகிறது.

இலங்கையின் மத்தியகால வருவாய் உபாயத் திட்டம் குறுகியகால வரி இறுக்கத்திற்கான ஒரு கருவியாகப் பார்க்கப்படக் கூடாது. மாறாக, அண்மையில் கிடைத்த வருவாய் அதிகரிப்பைப் பாதுகாத்தல், நவீன வரி நிர்வாகத்திற்குத் தேவையான சட்டக் கட்டமைப்பைப் புதுப்பித்தல், நெருக்கடிக்குப் பின்னரான எதிர்வினை அடிப்படையிலான நிர்வாக முறையிலிருந்து நவீனமானதும் நம்பகமானதுமான வருவாய் முறைக்கு மாறுதல் ஆகியவற்றுக்கான தளமாக அது அமைய வேண்டும் என்று அறிக்கை தெரிவிக்கிறது.

எளிதில் அடையக்கூடிய வரிக் கொள்கைச் சீர்திருத்தங்களின் பலன்கள் பெருமளவில் எட்டப்பட்டுவிட்ட நிலையில், சட்டரீதியான வரி விகிதங்களைத் தொடர்ந்து அதிகரிப்பதை இந்த உபாயத் திட்டம் முக்கியமாக நம்பியிருக்கக் கூடாது என்றும் ஐ.எம்.எப். வலியுறுத்தியுள்ளது.

வரி செலுத்தாதவர்களின் எண்ணிக்கை அதிகரிப்பு

வெறுமனே வரிக் கணக்குகளைச் சமர்ப்பிப்பதில் ஏற்படும் தாமதம் மட்டுமே பிரச்சினை அல்ல என்பதைப் புள்ளிவிபரங்கள் வெளிப்படுத்துகின்றன.

பெறுமதி சேர் வரியைப் பொறுத்தவரையில், 2025ஆம் ஆண்டுக்கும் 2026ஆம் ஆண்டின் முதல் காலாண்டுக்கும் இடையில் உரிய காலத்தில் வரிக் கணக்குகளைச் சமர்ப்பித்தவர்களின் விகிதம் அதிகரித்துள்ளது.

பெரிய வரி செலுத்துவோர் மத்தியில் இந்த விகிதம் 80.1 சதவீதத்திலிருந்து 85.7 சதவீதமாக அதிகரித்தது. பெரிய வரி செலுத்துவோர் அல்லாதவர்களின் மத்தியில் 45.9 சதவீதத்திலிருந்து 55.9 சதவீதமாக உயர்ந்தது.

ஆனால், வரிக் கணக்குகளைச் சமர்ப்பிக்காதவர்களின் விகிதம் இதே காலப்பகுதியில் அதிகரித்துள்ளது.

பெரிய வரி செலுத்துவோர் அல்லாதவர்களில் இந்த விகிதம் 12.3 சதவீதத்திலிருந்து 19.1 சதவீதமாகவும், பெரிய வரி செலுத்துவோர் மத்தியில் 0.3 சதவீதத்திலிருந்து 4 சதவீதமாகவும் அதிகரித்துள்ளது.

இதன் மூலம், அண்மைக்கால வரி இணக்க நடவடிக்கைகள் உரிய காலத்தில் வரிக் கணக்குகளைச் சமர்ப்பிப்பதில் முன்னேற்றத்தை ஏற்படுத்தியுள்ள போதிலும், வரிக் கணக்குகளைச் சமர்ப்பிக்காதவர்களின் எண்ணிக்கையைக் குறைப்பதில் போதிய முன்னேற்றத்தை ஏற்படுத்தவில்லை என்பது தெளிவாகிறது.

எனவே, வரிக் கணக்குகளைச் சமர்ப்பிக்காதவர்களை அடையாளம் காண்பதற்கும், அவர்களைப் பின்தொடர்ந்து நடவடிக்கை எடுப்பதற்கும் வலுவான ஏற்பாடுகள் அவசியம் என்று ஐ.எம்.எப். தெரிவித்துள்ளது.

வருமான வரி தொடர்பான நிலைமை இதைவிட மோசமாக உள்ளது.

2025ஆம் ஆண்டில், நிறுவன வருமான வரி (Corporate Income Tax – CIT) செலுத்துவோரில் 52.7 சதவீதமானவர்கள் வரிக் கணக்குகளைச் சமர்ப்பிக்கவில்லை.

தனிநபர் வருமான வரி (Personal Income Tax – PIT) செலுத்துவோரில் 45.6 சதவீதமானவர்களும், தனிநபர் வருமான வரி வகையின் கீழ் பதிவுசெய்யப்பட்ட மற்றொரு பிரிவினரான Individual Income Tax (IIT) செலுத்துவோரில் 67.8 சதவீதமானவர்களும் வரிக் கணக்குகளைச் சமர்ப்பிக்கவில்லை.

இந்த மூன்று வரிப் பிரிவுகளிலும் உரிய காலத்தில் வரிக் கணக்குகளைச் சமர்ப்பித்தவர்களைவிட, அவற்றைச் சமர்ப்பிக்காதவர்களின் எண்ணிக்கையே அதிகமாக இருந்தது.

மின்னணு முறையில் வரிக் கணக்குகளைச் சமர்ப்பிக்கும் வசதி இல்லாதது இதற்குக் காரணமல்ல. மாறாக, வரிக் கணக்குகளைச் சமர்ப்பிக்காதவர்களைக் கண்டறிதல், அவர்களைப் பின்தொடர்தல் மற்றும் சட்ட அமுலாக்கத்தின் நம்பகத்தன்மை ஆகியவற்றில் காணப்படும் பலவீனங்களே இதற்குக் காரணம் என்று ஐ.எம்.எப். தெரிவித்துள்ளது.

தேர்ந்தெடுக்கப்பட்ட தெற்காசிய நாடுகளுடன் ஒப்பிடுகையில், அனைத்து முக்கிய வரி வகைகளிலும் உரிய காலத்தில் வரிக் கணக்குகளைச் சமர்ப்பிக்கும் விடயத்தில் இலங்கை மிகவும் மோசமான நிலையில் இருப்பதாகவும் அறிக்கை சுட்டிக்காட்டியுள்ளது.

பதிவுசெய்யப்பட்ட வரி செலுத்துவோரில் கணிசமான எண்ணிக்கையினர் தமது வரிக் கணக்குகளை உரிய காலத்தில் சமர்ப்பிப்பதில்லை அல்லது வரி செலுத்துவோர் பதிவேட்டில் தொடர்ந்து இடம்பெற்றிருந்தாலும் செயலற்றவர்களாக மாறியுள்ளனர் என்பதையே இலங்கையின் புள்ளிவிபரங்கள் வெளிப்படுத்துகின்றன என்று அறிக்கை கூறுகிறது.

இதனால், வரி செலுத்துவோர் பதிவேடுகளைச் சுத்தப்படுத்துவது (Register Cleanup) சீர்திருத்தத்தின் முக்கிய அம்சமாகியுள்ளது.

பெறுமதி சேர் வரி மற்றும் நிறுவன வருமான வரி பதிவேடுகளைச் சுத்தப்படுத்தும் நடவடிக்கைகள் 2026 ஜூலை மாதத்திற்கான கட்டமைப்பு இலக்கை எட்டும் வகையில் முன்னெடுக்கப்பட்டு வருகின்றன.

ஆனால், தனிநபர் வருமான வரி (IIT) பதிவேடுகளைச் சுத்தப்படுத்துவதற்கு, அதிகளவிலான பதிவுகளைச் செயலாக்கக்கூடிய போதுமான சேவையகத் திறன் (Server Capacity) தேவைப்படுவதால், அந்த நடவடிக்கையை முன்னெடுப்பதில் தாமதம் ஏற்பட்டுள்ளது.

தொழில் வழங்குநர்களின் வரி இணக்கமும் பலவீனம்

தொழில் வழங்குநர்களிடமிருந்து பிடித்தம் செய்யப்படும் வரிகள் தொடர்பிலும் இதேபோன்ற பலவீனங்கள் காணப்படுகின்றன.

2025/26ஆம் ஆண்டில் வரிக் கணக்குகளைச் சமர்ப்பிக்க வேண்டிய 47,662 தொழில் வழங்குநர்களில், பெரிய வரி செலுத்துவோர் அலுவலகத்தின் (Large Taxpayer Office) நிர்வாகத்தின் கீழ் உள்ளவர்களில் 81 சதவீதமானவர்கள் உரிய காலத்தில் தமது கணக்குகளைச் சமர்ப்பித்துள்ளனர்.

ஆனால், நடுத்தர அளவிலான சுமார் 14,000 நிறுவன வரி செலுத்துவோர் மத்தியில் இந்த விகிதம் 38 சதவீதமாக மட்டுமே காணப்பட்டது.

அதேவேளை, பிராந்திய மற்றும் மாநகர அலுவலகங்களின் நிர்வாகத்தின் கீழ் உள்ள சுமார் 27,600 தொழில் வழங்குநர்களில் 13 சதவீதமானவர்கள் மட்டுமே உரிய காலத்தில் கணக்குகளைச் சமர்ப்பித்துள்ளனர்.

இதனால், தொழில் வழங்குநர்கள் பிடித்தம் செய்ய வேண்டிய வரிகளை முழுமையாகப் பிடித்தம் செய்கிறார்களா அல்லது பிடித்தம் செய்யப்பட்ட வரிகளை அரசாங்கத்திடம் செலுத்துகிறார்களா என்பதைக் கண்டறியும் உள்நாட்டு இறைவரித் திணைக்களத்தின் ஆற்றல் பாதிக்கப்படுவதாக ஐ.எம்.எப். தெரிவித்துள்ளது.

இடர் அடிப்படையிலான வரி நிர்வாகம் அவசியம்

இந்த மறுசீரமைப்பின் மைய அம்சமாக வரி இணக்க இடர் முகாமைத்துவம் (Compliance Risk Management – CRM) அமைய வேண்டும்.

அதாவது, தரவுகளைப் பயன்படுத்தி அதிக ஆபத்துள்ள வரி செலுத்துவோரை அடையாளம் கண்டு, அவர்களுக்கு எதிரான தணிக்கை, சட்ட அமுலாக்கம் மற்றும் சேவை வளங்களை முன்னுரிமை அடிப்படையில் ஒதுக்குவதே இந்த முறையாகும்.

பெறுமதி சேர் வரி இணக்கத்தை மேம்படுத்துவதற்கான திட்டங்கள் நடைமுறையில் உள்ளன. எனினும், இடர் பதிவேடுகள், மூன்றாம் தரப்புத் தரவுகள் மற்றும் தரவுப் பகுப்பாய்வு ஆகியவை அனைத்து வரி வகைகளிலும் சீரான முறையில் பயன்படுத்தப்படுவதில்லை என்று ஐ.எம்.எப். தெரிவித்துள்ளது.

இதன் விளைவாக, யாரைத் தொடர்புகொள்ள வேண்டும், யாரைத் தணிக்கைக்கு உட்படுத்த வேண்டும், யாருக்கு உதவி வழங்க வேண்டும், யாருக்கு எதிராகச் சட்ட நடவடிக்கை எடுக்க வேண்டும் என்பதைத் தீர்மானிப்பதில் இடர் பகுப்பாய்வு இன்னமும் தீர்மானிக்கும் சக்தியாக அமையவில்லை.

சட்டத்தில் தண்டனைகள் மற்றும் அபராதங்களுக்கான ஏற்பாடுகள் இருந்தாலும், அவை சீரான முறையில் நடைமுறைப்படுத்தப்படுவதில்லை என்றும் அறிக்கை சுட்டிக்காட்டியுள்ளது.

நிலுவை வரிகள் 2.1 டிரில்லியன் ரூபாவாக அதிகரிப்பு

வரி நிலுவைகளும் மற்றொரு முக்கிய பிரச்சினையாக உருவெடுத்துள்ளன.

2025 டிசம்பர் 31ஆம் திகதியன்று வரி நிலுவைகள் சுமார் 2.1 டிரில்லியன் ரூபாவாக இருந்தன. இது 2024ஆம் ஆண்டில் காணப்பட்ட சுமார் 1.1 டிரில்லியன் ரூபாவைவிட இரண்டு மடங்காக அதிகரித்துள்ளது.

இந்தத் தொகையில் சுமார் 1.6 டிரில்லியன் ரூபா சர்ச்சைக்குரிய வரி நிலுவைகளாக (Disputed Tax Arrears) காணப்படுகின்றன.

சர்ச்சைக்கு உட்படாத வரி நிலுவைகள்கூட நீண்டகாலமாக வசூலிக்கப்படாமல் இருப்பது, பணியாளர் பற்றாக்குறை, முன்னுரிமை அடிப்படையிலான நடவடிக்கைகளில் உள்ள பலவீனம் மற்றும் வசூலிக்கக்கூடிய கடன்களையும், குறைந்த பெறுமதியுடைய, சர்ச்சைக்குரிய அல்லது வசூலிக்கப்படுவதற்கான வாய்ப்புக் குறைந்த கடன்களையும் வேறுபடுத்துவதற்கான இடர் அடிப்படையிலான கட்டமைப்பு இல்லாமை ஆகியவற்றை வெளிப்படுத்துவதாக ஐ.எம்.எப். தெரிவித்துள்ளது.

மோசமான கடன்களை (Bad Debts) தள்ளுபடி செய்வதற்கும் உள்நாட்டு இறைவரித் திணைக்களத்திற்கு அதிகாரம் இல்லை. அவ்வாறான நடவடிக்கைகளுக்கு நிதி அமைச்சின் அனுமதியைப் பெறுவதற்காக முன்மொழிவுகளைச் சமர்ப்பிக்க வேண்டியுள்ளது.

தகவல் தொழில்நுட்பக் கட்டமைப்பே உடனடி ஆபத்து

வரி நிர்வாகத்தின் தகவல் தொழில்நுட்பக் கட்டமைப்பே தற்போது மிக உடனடியான ஆபத்தாக இருப்பதாக ஐ.எம்.எப். எச்சரித்துள்ளது.

உள்நாட்டு இறைவரித் திணைக்களத்தின் முக்கிய கணினி முறைமையான வருவாய் நிர்வாக முகாமைத்துவ தகவல் முறைமை (Revenue Administration Management Information System – RAMIS), வரி செலுத்துவோர் பதிவு, வரிக் கணக்குகளைச் சமர்ப்பித்தல், கொடுப்பனவுகள், நிலுவைகள், தணிக்கை, வரி மீளளிப்புகள் மற்றும் வரி செலுத்துவோருக்கான சேவைகள் உள்ளிட்ட முக்கிய நடவடிக்கைகளை நிர்வகித்து வருகிறது.

இந்த முறைமையைப் பராமரிப்பதற்கான ஒப்பந்தம் 2027 ஜனவரி 31ஆம் திகதியுடன் முடிவடைகிறது.

அதன்பின்னர் இலங்கையைத் தளமாகக் கொண்ட ஆதரவு முறைக்கு மாறுவதற்கான திட்டமிடல் இதுவரை ஆரம்பிக்கப்படவில்லை.

மேலும், 2025–2027ஆம் ஆண்டுகளுக்கான உள்நாட்டு இறைவரித் திணைக்களத்தின் தகவல் தொழில்நுட்ப மூலோபாயத் திட்டத்தின் கீழ் முன்னெடுக்கப்பட வேண்டிய அடிப்படை நடவடிக்கைகளும் எதிர்பார்த்தபடி முன்னேறவில்லை.

இதில் தரவுக் களஞ்சியத்தை (Data Warehouse) கொள்வனவு செய்தல் மற்றும் RAMIS 3.0 முறைமைக்கான தேவைகளை வரையறுத்தல் ஆகியவையும் அடங்குகின்றன.

வெளிநாட்டு சேவை வழங்குநரின் தொழில்நுட்ப ஆதரவு, முறைமைப் பராமரிப்பு அல்லது செயல்பாட்டுச் சிக்கல்களுக்கான தீர்வுகள் ஆகியவற்றில் ஏதேனும் இடையூறு ஏற்பட்டால், அத்தியாவசிய வரி நிர்வாகச் செயற்பாடுகள் பாதிக்கப்படுவதுடன், அண்மையில் எட்டப்பட்ட வருவாய் அதிகரிப்பும் ஆபத்துக்குள்ளாகலாம் என்று ஐ.எம்.எப். எச்சரித்துள்ளது.

வரி விகித மாற்றங்களுக்கு முன்னர் நிர்வாகத் தயார்நிலை அவசியம்

வரி நிர்வாகத்தின் செயற்பாட்டுத் தயார்நிலைக்கு ஏற்பவே வரிக் கொள்கை மாற்றங்களும் முன்னெடுக்கப்பட வேண்டும் என்று ஐ.எம்.எப். வலியுறுத்தியுள்ளது.

பெறுமதி சேர் வரிக்கான (VAT) வரம்புகளைக் குறைப்பதற்கு முன்னரும் அல்லது கணிசமான எண்ணிக்கையிலான புதிய வரி செலுத்துவோரை வரி முறைக்குள் கொண்டுவருவதற்கு முன்னரும், உள்நாட்டு இறைவரித் திணைக்களம் பின்வரும் அம்சங்களில் குறிப்பிடத்தக்க முன்னேற்றத்தை ஏற்படுத்த வேண்டும் என்று அறிக்கை பரிந்துரைக்கிறது:

• வரி செலுத்துவோர் பதிவேடுகளின் தரத்தை மேம்படுத்துதல்.
• டிஜிட்டல் முறையிலான வரிக் கணக்குச் சமர்ப்பிப்பு மற்றும் வரிக் கொடுப்பனவுகளை விரிவுபடுத்துதல்.
• வரி செலுத்துவோருக்கான சேவைகளை மேம்படுத்துதல்.
• வரி மீளளிப்புகளில் ஏற்படக்கூடிய மோசடிகள் மற்றும் இடர்களைக் கட்டுப்படுத்துதல்.

ஐந்து ஆண்டுகளில் மேலதிகமாக 1.9 சதவீத பொருளாதார வளர்ச்சி வருவாய் சாத்தியம்

இந்த மறுசீரமைப்புகள் வெற்றிகரமாகவும் தொடர்ச்சியாகவும் முன்னெடுக்கப்பட்டால், இலங்கைக்கு குறிப்பிடத்தக்க நிதிப் பலன்கள் கிடைக்கக்கூடும் என்று ஐ.எம்.எப். மதிப்பிட்டுள்ளது.

வருவாய் நிர்வாகத்தின் செயற்பாட்டுத் திறனை அளவிடும் செயற்பாட்டு வலிமைக் குறியீட்டில் (Operational Strength Index – OSI) இலங்கையின் தற்போதைய 0.39 புள்ளிகளை ஐந்து ஆண்டுகளில் 0.55 புள்ளிகளாக உயர்த்தினால், உள்நாட்டில் திரட்டப்படும் வருவாய் மொத்த உள்நாட்டு உற்பத்தியின் சுமார் 1.9 சதவீதத்தால் அதிகரிக்கக்கூடும் என்று ஐ.எம்.எப். கணித்துள்ளது.

எனினும், இந்த மதிப்பீடு விளக்க நோக்கத்திற்கான ஒரு கணிப்பே தவிர, மத்தியகால வருவாய் உபாயத் திட்டத்தின் (MTRS) வருவாய் இலக்காகக் கருதப்படக் கூடாது என்றும் அது எச்சரித்துள்ளது.

இந்தக் கணிப்பில் சுங்கம், கலால் வரி மற்றும் வரிக் கொள்கை மாற்றங்கள் மூலம் கிடைக்கக்கூடிய வருவாய்கள் உள்ளடக்கப்படவில்லை. மேலும், மேலதிக ஆய்வுகள் இன்றி இந்தத் தொகையை ஏற்கனவே கணிக்கப்பட்டுள்ள அடிப்படை வருவாய்க்கு மேலதிகமான வருவாயாகக் கருதவும் முடியாது என்று அறிக்கை தெளிவுபடுத்தியுள்ளது.

நவீன வரிச் சட்டக் கட்டமைப்பு தேவை

நீண்டகால அடிப்படையில், வரி செலுத்துவோர் பதிவுசெய்யப்படுவது முதல் மேன்முறையீடுகள் மற்றும் வரி செலுத்துவோரின் உரிமைகள் வரையிலான அனைத்து விடயங்களையும் உள்ளடக்கிய நவீன வரி நடைமுறைக் குறியீட்டை (Tax Procedures Code) உருவாக்குவது குறித்து ஆராய வேண்டும் என்றும் ஐ.எம்.எப். பரிந்துரைத்துள்ளது.

எனினும், ஆரம்பத்திலேயே பெரிய கட்டமைப்பு மாற்றங்களை நோக்கிச் செல்வதைத் தவிர்க்க வேண்டும் என்றும் அது எச்சரித்துள்ளது.

வருவாய் நிர்வாகத்திற்கெனத் தனியான அதிகாரசபையை (Revenue Authority) உருவாக்குவது அல்லது தற்போதைய நிறுவனக் கட்டமைப்புகளை மேலும் ஒருங்கிணைப்பது போன்ற யோசனைகள் பரிசீலிக்கப்படலாம்.

ஆனால், அவ்வாறான மாற்றங்கள் முதலில் நடைமுறை, சட்ட மற்றும் நிறுவன அடித்தளங்கள் வலுப்படுத்தப்பட்ட பின்னரே முன்னெடுக்கப்பட வேண்டும். அந்த அடிப்படைத் தேவைகளுக்குப் பதிலாக இத்தகைய கட்டமைப்பு மாற்றங்கள் அமையக்கூடாது என்று அறிக்கை வலியுறுத்தியுள்ளது.

சீர்திருத்த வேகம் குறைவதே முக்கிய ஆபத்து

உடனடி பொருளாதார நெருக்கடியின் தாக்கம் குறைந்த பின்னர், சீர்திருத்தங்களை முன்னெடுப்பதில் அரசாங்கத்தின் வேகம் தளர்வடைவதே முக்கியமான நடைமுறை ஆபத்து என்று ஐ.எம்.எப். அடையாளம் கண்டுள்ளது.

எனவே, சீர்திருத்தங்களுக்கு அரசியல் மற்றும் பொதுமக்கள் ஆதரவைத் தொடர்ந்து தக்கவைத்துக் கொள்வதற்காக ஆரம்பத்திலேயே நம்பகமான வெற்றிகளைப் பெற்றுக்காட்ட வேண்டும் என்றும் அது வலியுறுத்தியுள்ளது.

வரி செலுத்துவோர் தொடர்பான தரவுகளைச் சுத்தப்படுத்துதல், வரிக் கணக்குச் சமர்ப்பிப்பு மற்றும் கொடுப்பனவுகளைக் கட்டுப்படுத்தும் முறைகளை வலுப்படுத்துதல், வரி இணக்கத்தைப் பேணும் வரி செலுத்துவோருக்கு மேலும் கணிக்கக்கூடியதும் நம்பகமானதுமான நிர்வாக அணுகுமுறையை உறுதிப்படுத்துதல் ஆகியவை அத்தகைய ஆரம்பகட்ட வெற்றிகளாக அமைய வேண்டும் என்று ஐ.எம்.எப். தெரிவித்துள்ளது.

(நன்றி: பைனான்சியல் டைம்ஸ்)