கொழும்பு போர்ட் சிட்டி ஒரு மோசடியா? வெளிநாட்டு விருத்தியாளர்கள் இல்லை; வெளிநாட்டு வாங்குபவர்களும் குறைவு

ஒரு தசாப்த காலமாக மணல் மேடாகக் காட்சியளித்த கொழும்புத் துறைமுக நகரம் (Port City), இப்போது ஓரளவுக்கு வேகமெடுக்கத் தொடங்கியுள்ளது. குறைந்தது 150 நிறுவனங்கள் அங்கு தமது அலுவலகங்களை அமைத்துள்ளன. ஆனால், சற்று ஆழமாக ஆராய்ந்து பார்த்தால், அனைத்தும் திட்டமிட்டபடி நடைபெறவில்லை என்பது புலப்படுகிறது. இந்த வலயம் உள்ளூர் காணி மற்றும் சொத்துச் சந்தை ஊக வணிகர்களையும், சந்தேகத்திற்குரிய வெளிநாட்டுக் கடல்கடந்த நிறுவனங்களையும் ஈர்த்துள்ளதே தவிர, சர்வதேச அளவில் நற்பெயர் பெற்ற பெரிய முதலீட்டாளர்களை அதிகளவில் ஈர்க்கவில்லை.

புகழ்பெற்ற பெரிய வெளிநாட்டு முதலீட்டாளர்களை ஈர்ப்பதற்குப் பதிலாக, போர்ட் சிட்டி காணி மற்றும் சொத்துச் சந்தை ஊக வணிகர்கள், வெளிநாடுகளில் வாழ்ந்து ஓய்வுபெற்ற பின்னர் தாயகம் திரும்ப விரும்பும் இலங்கையர்கள், உள்ளூர் வாய்ப்புவாதிகள் மற்றும் சூதாட்ட நிறுவனங்கள் ஆகியவற்றையே கவர்ந்து வருகிறது.

இந்த ஆண்டின் தொடக்கத்தில் Echelon இதழுக்கு வழங்கிய நேர்காணலில், போர்ட் சிட்டியின் இருப்புக்கான காரணத்தை அதன் நிர்வாகத் தலைமை விளக்கியிருந்தது.

போர்ட் சிட்டியில் வழங்கப்படும் வரி விலக்குகள், வணிகத்திற்குச் சாதகமான ஒழுங்குவிதிகள், வெளிநாட்டுப் பணியாளர்களுக்கான நெகிழ்வான விசா நடைமுறைகள், கொள்கை நிலைத்தன்மை மற்றும் அரசாங்க ஆதரவு குறித்த உத்தரவாதங்கள் ஆகியவை வெளிநாட்டு முதலீட்டாளர்களை ஈர்க்கும் என அவர்கள் தெரிவித்தனர்.

இந்த முதலீட்டாளர்கள் நாட்டுக்குள் பணத்தைக் கொண்டுவருவார்கள். பின்னர், அந்தப் பணத்தின் ஒரு பகுதியை போர்ட் சிட்டிக்கு வெளியேயும் செலவிடுவார்கள். இதன் மூலம் நாட்டின் பிரதான பொருளாதாரத்திற்கும் ஊக்கம் கிடைக்கும். வேறு சூழ்நிலைகளில் இலங்கைக்கு வந்திருக்காத நிறுவனங்கள்கூட இங்கு முதலீடு செய்வதுடன், உள்ளூர் மக்களுக்குத் தொழில் வாய்ப்புகளையும் வழங்கக்கூடும் என்று அவர்கள் விளக்கினர்.

போர்ட் சிட்டியை சீனாவின் China Harbour Engineering Company நிறுவனம் அபிவிருத்தி செய்தது. சிங்கப்பூர் அல்லது துபாய் போன்ற மாற்று வர்த்தக மையங்களுடன் ஒப்பிடும்போது, போர்ட் சிட்டியில் ஒரு தொழிலை ஆரம்பிப்பதற்கான செலவு ஏறத்தாழ நான்கில் ஒரு பங்கு குறைவாக இருப்பது அதன் போட்டித்திறன்களில் ஒன்றாகும் என்று சீனா ஹார்பர் போர்ட் சிட்டி திட்டத்தின் பிரதி முகாமைத்துவப் பணிப்பாளர் துல்சி அலுவிஹாரே The Examiner ஊடகத்திடம் தெரிவித்தார்.

அரசியல் ரீதியாக நடுநிலையான நாடாக இலங்கை இருப்பதால், தெற்காசியாவின் ‘துபாய்’ ஆக போர்ட் சிட்டியை உருவாக்க முடியும். பிராந்தியம் முழுவதிலுமுள்ள நிறுவனங்கள் ஒன்றுகூடும் வர்த்தக மையமாக அது விளங்கக்கூடும் என்றும் அவர் கூறினார்.

எனினும், சீனாவின் ஆதிக்கத்தில் உள்ள ஒரு தளமாகப் போர்ட் சிட்டி பார்க்கப்படுவது அதன் நற்பெயருக்குப் பாதிப்பை ஏற்படுத்தியுள்ளது. இந்திய முதலீட்டாளர்களை ஈர்ப்பதற்கு இது ஒரு முக்கியத் தடையாக இருந்து வருவதாக அலுவிஹாரே கடந்த மாதம் Daily Mirror பத்திரிகைக்கு வழங்கிய நேர்காணலில் தெரிவித்தார்.

போர்ட் சிட்டி பொருளாதார ஆணைக்குழுவின் முன்னாள் உறுப்பினர் ஒருவரும் இதனை ஏற்றுக்கொண்டார். இந்த வலயத்தை நிர்வகிக்கும் பொறுப்பைக் கொண்ட நிர்வாக  அமைப்பே போர்ட் சிட்டி பொருளாதார ஆணைக்குழுவாகும்.

போர்ட் சிட்டியின் வெற்றிக்கு இந்திய முதலீட்டாளர்கள் மிகவும் முக்கியமானவர்கள் என்று அவர்கள் கருதுகின்றனர். கடந்த காலங்களில் இந்தத் திட்டத்தைப் பற்றி நேர்மறையான செய்திகளை எழுதுவதற்காக இந்திய ஊடகவியலாளர்களை ஈர்க்கும் முயற்சிகளும் செய்யப்பட்டுள்ளன.

ஊடகங்களுடன் பேசும்போதெல்லாம், சீனா ஹார்பர் நிறுவனத்தின் பங்கு வரையறுக்கப்பட்டதே என்பதை ஆணைக்குழு வலியுறுத்தி வருகிறது.

ஆனால், இதுவரை மேற்கொள்ளப்பட்ட இந்த முயற்சிகள் எதிர்பார்த்த பலனை அளித்ததாகத் தெரியவில்லை. Hexaware நிறுவனத்தின் இலங்கைக் கிளையைத் தவிர, வேறு எந்த இந்திய நிறுவனமும் போர்ட் சிட்டியில் பதிவு செய்துள்ளதாகத் தெரியவில்லை.

சீனா ஹார்பர் வெளியேறத் திட்டமிடுகிறதா?

2014ஆம் ஆண்டு, கொழும்புக் கரையோரக் கடற்பகுதியில் மண்ணை நிரப்பி போர்ட் சிட்டியை உருவாக்கும் பணியைச் சீனா ஹார்பர் நிறுவனம் ஆரம்பித்தது.

இத்திட்டத்தின் அடித்தளப் பணிகளுக்காக அந்த நிறுவனம் 1.4 பில்லியன் அமெரிக்க டொலர்களைச் செலவிட்டது. இதற்குப் பதிலாக, இலங்கை அரசாங்கத்துடனான ஒப்பந்தத்தின் கீழ், போர்ட் சிட்டியின் 43 சதவீத நிலப்பரப்பில் 99 ஆண்டுக் குத்தகை உரிமையைப் பெற்றது.

இன்று, 12 ஆண்டுகளுக்குப் பின்னர், சீனா ஹார்பர் நிறுவனம் தனக்குள்ள 48 காணித் துண்டுகளில் மூன்றில் ஒரு பங்கிற்கான குத்தகை உரிமைகளை ஏனைய நிறுவனங்களுக்கு விற்றுள்ளது. மேலும், ஒரு காணித்துண்டைத் தவிர ஏனைய அனைத்தையும் விற்பனை செய்யத் திட்டமிட்டுள்ளது.

“அவர்கள் சிறிது பணம் சம்பாதிக்கவும், தமது முதலீட்டை மீளப் பெற்றுக்கொள்ளவும், இந்தத் திட்டத்திலிருந்து வெளியேறவும் விரும்புகின்றனர்” என்று போர்ட் சிட்டியுடன் தொடர்புடைய இரு வட்டாரங்கள் தெரிவித்தன.

புதிய சர்வதேச அபிவிருத்தியாளர்கள் இல்லை..

இந்த விசேட பொருளாதார வலயத்தில் தற்போது முதலீடு செய்துவரும் நிறுவனங்கள்கூட, உயர்தர வெளிநாட்டு நேரடி முதலீடுகளை ஈர்ப்பது தொடர்பாக முன்வைக்கப்பட்ட வாக்குறுதிகளுக்கு முழுமையாகப் பொருந்தவில்லை.

சீனா ஹார்பர் நிறுவனத்தைத் தவிர, அங்கு முதலீடு செய்துள்ள சொத்து அபிவிருத்தி நிறுவனங்கள் எதுவும் வெளிநாட்டு நிறுவனங்கள் அல்ல.

இதுவரை முதலீடு செய்துள்ள நிறுவனங்கள்:

• International Construction Consortium (ICC)
• Prime Lands
• Home Lands
• Phoenix
• Browns

இறக்குமதிப் பொருட்களுக்கு வழங்கப்படும் தாராளமான வரி விலக்குகள் காரணமாக, போர்ட் சிட்டியில் கட்டுமானச் செலவுகள் நாட்டின் பிரதான நிலப்பகுதியில் உள்ள செலவுகளைவிடக் கணிசமாகக் குறைவாக உள்ளன.

உள்ளூர் முதலீட்டாளர்களின் ஆதிக்கம் குறித்து அலுவிஹாரே கவலைப்படவில்லை. இதனை அவர் “உள்ளூர் முதலீட்டாளர்களின் பக்கம் அதிகம் சாய்ந்துள்ள நிலை” எனக் குறிப்பிட்டார்.

“எந்த இடத்திலும் இதுபோன்ற நிலை இருப்பது வழக்கமானதே. உள்ளூர் முதலீட்டாளர்கள் எவ்வாறு எதிர்வினையாற்றுகிறார்கள் என்பதைப் பார்த்த பின்னரே வெளிநாட்டு முதலீட்டாளர்கள் முடிவெடுப்பார்கள்” என்று அவர் தெரிவித்தார்.

இதுவரை, சீனா ஹார்பர் நிறுவனம் தனக்குச் சொந்தமான 48 காணித் துண்டுகளில் 15 காணித் துண்டுகளுக்கான குத்தகை உரிமைகளை விற்றுள்ளது. அவற்றில் கிட்டத்தட்ட அனைத்தையும் உள்ளூர் நிறுவனங்களே பெற்றுள்ளன.

எனினும், ஐக்கிய அரபு அமீரகம் மற்றும் சவூதி அரேபியாவிலிருந்து தமது காணித்துண்டுகள் தொடர்பாக விசாரணைகள் மேற்கொள்ளப்படுவதாக அவர் கூறினார்.

காலப்போக்கில், பெரும்பாலான காணித்துண்டுகளுக்கான குத்தகை உரிமைகளை வெளிநாட்டு அபிவிருத்தியாளர்கள் பெறுவார்கள் என்றும், உள்ளூர் அபிவிருத்தியாளர்களின் பங்கு அதிகபட்சம் 20 சதவீதமாக இருக்கும் என்றும் அவர் எதிர்பார்க்கிறார்.

உள்ளூர் சொத்து அபிவிருத்தி நிறுவனங்கள் தமது காணித்துண்டுகளுக்கான குத்தகையை இலங்கை ரூபாயில் பெற்றுள்ளன. ஆனால், அங்கு கட்டுமானப் பணிகளை மேற்கொள்வதற்குத் தேவையான நிதியின் ஒரு பகுதியை வெளிநாடுகளிலிருந்து திரட்டுவதாக அவை உறுதியளித்துள்ளன.

கொழும்புத் துறைமுக நகரப் பொருளாதார ஆணைக்குழுச் சட்டத்தின்படி, போர்ட் சிட்டியில் கட்டடங்களை நிர்மாணிப்பதற்கான அனைத்துப் பெருமட்ட அபிவிருத்திப் பணிகளுக்கும் இலங்கைக்குள் வெளிநாட்டு நாணயமாகக் கொண்டுவரப்படும் நிதியே பயன்படுத்தப்பட வேண்டும்.

உதாரணமாக, ICC நிறுவனம், 231 அடுக்குமாடி வீடுகளைக் கொண்ட தனது குடியிருப்புத் திட்டத்தின் கட்டுமானத்திற்குப் பயன்படுத்தப்படும் நிதியில் 66 மில்லியன் அமெரிக்க டொலர்கள் வெளிநாட்டு முதலீட்டாளர்களிடமிருந்து பெறப்படும் என உறுதியளித்திருந்தது.

கட்டுமானப் பணிகள் நடைபெற்றுக்கொண்டிருக்கும்போதே வீடுகளை முன்கூட்டியே விற்பனை செய்து, வாங்குபவர்களிடமிருந்து தவணை முறையில் பணத்தைப் பெற்று அவர்கள் நிதியைத் திரட்டுகின்றனர்.

ICC நிறுவனம் தனது அடுக்குமாடி வீடுகளில் 40 சதவீதத்தை இலங்கை ரூபாயிலும், எஞ்சியவற்றை வெளிநாட்டு நாணயத்திலும் விற்பனை செய்கிறது. ரூபாயில் விற்பனை செய்யப்படும் வீடுகளுக்கே அதிக கேள்வி காணப்படுகிறது.

திட்டம் ஆரம்பிக்கப்பட்ட சில மாதங்களுக்குள் ரூபாயில் விற்பனை செய்யப்படும் வீடுகளில் 90 சதவீதமானவை விற்பனையாகிவிட்டதாக, Bay One Residences திட்டத்தை அபிவிருத்தி செய்யும் ICC Port City நிறுவனத்தின் நிறைவேற்றுப் பணிப்பாளர் ஜெரோம் குணவர்தன தெரிவித்தார்.

“உள்ளூரில் அதிக சொத்துகளைக் கொண்ட செல்வந்தர்கள், முதலீட்டு நோக்கில் இந்தத் திட்டத்தில் மிகுந்த ஆர்வம் காட்டுகின்றனர். போர்ட் சிட்டிக்குள் அமைந்துள்ளதால், இன்னும் சில ஆண்டுகளில் இதன் பெறுமதி இரட்டிப்பாகும் என அவர்கள் கருதுகின்றனர்” என்று அவர் கூறினார்.

மற்றொரு சொத்து அபிவிருத்தித் திட்டத்தில், வெளிநாட்டு நாணயத்தில் மேற்கொள்ளப்பட்ட விற்பனைகளில் கிட்டத்தட்ட அனைத்தையும் இலங்கைப் புலம்பெயர் சமூகத்தைச் சேர்ந்தவர்களே வாங்கியுள்ளனர். அவர்கள் ஓய்வுபெற்ற பின்னர் தாயகம் திரும்பி வாழ விரும்புகின்றனர்.

“உண்மையான வெளிநாட்டவர் ஒருவர் மட்டுமே வாங்குபவர்களில் இருக்கலாம் என நான் கருதுகிறேன்” என்று அந்தத் திட்டத்தின் பணிப்பாளர் ஒருவர் தெரிவித்தார்.

கட்டுப்பாடற்ற சொத்து ஊக வணிகம்: உருவாகிறதா புதிய பொருளாதாரக் குமிழி?

ஆடம்பரச் சொத்துச் சந்தை வேகமாக விரிவடைந்துவரும் நிலையில், அதனை மேற்பார்வை செய்வதற்குப் போதிய ஒழுங்குவிதிகள் இல்லாதது குறித்து பொருளாதார நிபுணர் உமேஷ் மொரமுதலி கவலை தெரிவித்துள்ளார்.

சொத்துகளின் விலைகள் ஊகத்தின் அடிப்படையில் அதிகரிப்பதால், சந்தையில் ஒரு பொருளாதாரக் குமிழி உருவாகும் அபாயமும் இருப்பதாக அவர் எச்சரிக்கிறார்.

போர்ட் சிட்டியில், நான்கு ஆண்டுகளில் 100 சதவீத இலாபம் கிடைக்கும் என்பது போன்ற நடைமுறைக்கு ஒவ்வாத வாக்குறுதிகளை அபிவிருத்தியாளர்கள் வழங்குகின்றனர். தமது விளம்பரங்களில் சொத்துகளின் பெறுமதியையும் மிகைப்படுத்திக் காட்டியுள்ளதாக நாடாளுமன்றத்தின் பொதுநிதி தொடர்பான குழு கண்டறிந்துள்ளது.

துபாயில் இருப்பதைப் போன்ற கவனமான சட்ட ஒழுங்குவிதிகள் இலங்கையில் இல்லாதது வெளிநாட்டு முதலீட்டாளர்களுக்கு ஒரு தடையாக இருப்பதாக மொரமுதலி கூறுகிறார்.

உதாரணமாக, கட்டுமான நிறுவனங்கள் கட்டாயமாக Escrow கணக்குகளைப் பயன்படுத்த வேண்டும் என்ற சட்டம் இலங்கையில் இல்லை. இத்தகைய கணக்குகள், திட்டத்திற்காகப் பெறப்படும் பணத்தைத் தனியாகப் பாதுகாத்து, ஒப்பந்த நிபந்தனைகளுக்கு அமைவாகப் பயன்படுத்த உதவுகின்றன.

இத்தகைய பாதுகாப்பு ஏற்பாடுகள் இல்லாததால், திட்டங்கள் நிதி முறைகேடுகளுக்கு உள்ளாகும் அபாயம் அதிகரிக்கிறது.

இதன் காரணமாக, தீவிரமான மற்றும் நம்பகமான முதலீட்டாளர்கள் இலங்கைக்கு வருவதைத் தவிர்க்கக்கூடும் என அவர் வாதிடுகிறார்.

“இலங்கையில் முறையான ஒழுங்குவிதிகள் இருக்க வேண்டும். எஸ்க்ரோ கணக்குகளும் ஒழுங்குவிதிகளும் இல்லாததைப் பல சர்வதேச முதலீட்டாளர்கள், முதலீட்டாளர்களுக்குப் போதிய பாதுகாப்பு இல்லை என்பதற்கான அறிகுறியாகப் பார்க்கின்றனர். இந்த ஒழுங்குவிதிகளை நடைமுறைப்படுத்துவதற்கான திறனும் எமக்குத் தேவை” என்று அவர் தெரிவித்தார்.

உண்மையில், போர்ட் சிட்டியில் தற்போது அலுவலக இடங்களை விட அடுக்குமாடிக் குடியிருப்புகளே அதிகம் உருவாக்கப்படுகின்றன.

உள்ளூர் அபிவிருத்தியாளர்கள் அடுக்குமாடிக் குடியிருப்புகளை விரும்புவதற்குக் காரணம், அவற்றின் மூலம் விரைவாகப் பணம் சம்பாதிக்க முடிவதாகும். அதாவது, அலுவலக இடங்களைக் கட்டி நீண்டகாலத்திற்கு வாடகைக்கு விடுவதன் மூலம் வருமானம் ஈட்டுவதற்குப் பதிலாக, குடியிருப்பு அலகுகளை நேரடியாக விற்பனை செய்து பணத்தைப் பெற்றுக்கொள்கின்றனர்.

Browns நிறுவனம் அலுவலகங்கள், ஹோட்டல்கள், கடைகள், குடியிருப்புகள் மற்றும் படகுத் துறைமுகம் ஆகியவற்றைக் கொண்ட கலப்புப் பயன்பாட்டுத் திட்டமொன்றை நிர்மாணித்து வருகிறது.

Phoenix நிறுவனமும் அலுவலகக் கட்டடமொன்றை நிர்மாணிக்கும் பணியை ஆரம்பிக்கிறது.

சீனா ஹார்பர் நிறுவனம் தற்போது நிர்மாணித்து வரும் ஒரே திட்டம், பல்வேறு பயன்பாடுகளைக் கொண்ட கொழும்பு சர்வதேச நிதி மையம் (Colombo International Finance Centre) ஆகும்.

ஏனைய சில முதலீட்டாளர்கள் பாடசாலை, மருத்துவமனை மற்றும் சர்வதேசப் பல்கலைக்கழகம் ஆகியவற்றை அமைப்பதாக உறுதியளித்திருந்தனர். ஆனால், மருத்துவமனைத் திட்டமும் பல்கலைக்கழக வளாகத் திட்டமும் பின்னர் விலகிவிட்டன.

உள்ளூர் நிறுவனங்கள் போர்ட் சிட்டியில் அலுவலகங்களை அமைக்கின்றன

அலுவலக இடங்களுக்கான கேள்வி இருப்பதாக ஜெரோம் குணவர்தன கூறுகிறார்.

“வணிகக் கட்டடங்களை நிர்மாணிப்பது முதலீட்டாளர்களுக்கு ஒரு நல்ல வாய்ப்பு என்பதை இப்போது நாம் உணர்கிறோம்” என்று அவர் தெரிவித்தார்.

ஆனால், சொத்துச் சந்தையில் மேற்கொள்ளப்படும் இந்தப் பெரும் முதலீட்டு முயற்சி வெற்றிபெறுமா என்பது, நிறுவனங்கள் போர்ட் சிட்டிக்குள் வருகிறார்களா, அங்கு வந்து தமது தொழில்களை வெற்றிகரமாக நடத்த முடிகிறதா என்பதிலேயே தங்கியுள்ளது.

தற்போது, போர்ட் சிட்டிக்குள் பதிவு செய்யப்பட்டுள்ள நிறுவனங்கள், அங்குள்ள கட்டடங்கள் தமது பயன்பாட்டிற்குத் தயாராகும் வரை, கொழும்பின் பிரதான நிலப்பகுதியில் உள்ள அலுவலகங்களில் தற்காலிகமாக இயங்குவதற்கு அனுமதிக்கப்பட்டுள்ளன.

முன்னதாக, இந்த நிறுவனங்கள் உலக வர்த்தக மையம் (World Trade Centre), ஷங்ரி-லா போன்ற குறிப்பிட்ட இடங்களில் மட்டுமே அலுவலகங்களை அமைக்க அனுமதிக்கப்பட்டிருந்தன.

ஆனால், இந்த இடங்களில் மிக அதிகமான வாடகை அறவிடப்படத் தொடங்கியதைத் தொடர்ந்து, போர்ட் சிட்டி ஆணைக்குழு விதிகளைத் தளர்த்தியது. இதன் மூலம், நிறுவனங்கள் கொழும்பில் எந்த இடத்திலும் அலுவலகங்களை வாடகைக்கு எடுத்து இயங்குவதற்கு அனுமதி வழங்கப்பட்டது.

“கட்டடங்கள் தயாரானதும், அவை அனைத்தும் மீண்டும் போர்ட் சிட்டிக்குள் வந்து இயங்க வேண்டும்” என்று ஆணைக்குழுவின் முன்னாள் உறுப்பினர் விளக்கினார்.

இதுவரை, 250 நிறுவனங்கள் போர்ட் சிட்டியில் தமது பதிவுகளை நிறைவு செய்துள்ளன அல்லது பதிவு செய்யும் நடவடிக்கைகளில் ஈடுபட்டுள்ளன.

அவற்றில் 157 நிறுவனங்கள் போர்ட் சிட்டியின் இணையத்தளத்தில் பகிரங்கமாகப் பட்டியலிடப்பட்டுள்ளன.

Deloitte மற்றும் Ncinga போன்ற அறியப்பட்ட நிறுவனங்களும் இந்தப் பட்டியலில் உள்ளன. எனினும், இந்த நிறுவனங்கள் ஏற்கெனவே பல ஆண்டுகளாக கொழும்பின் பிரதான நிலப்பகுதியில் இயங்கி வருகின்றன.

பிரித்தானியா, சிங்கப்பூர், மலேசியா, நோர்வே, அவுஸ்திரேலியா, ஹொங்கொங், ஐக்கிய அரபு அமீரகம் மற்றும் பிரித்தானிய வெர்ஜின் தீவுகள் ஆகிய இடங்களைச் சேர்ந்த நிறுவனங்களும் அங்கு பதிவு செய்யப்பட்டுள்ளன.

இவற்றில் சில நிறுவனங்கள் மிகச் சிறியவை. அவற்றுக்கென இணையத்தளம்கூட இல்லை. LinkedIn தளத்தில் ஒரேயொரு பணியாளர் மட்டுமே இருப்பதாகக் குறிப்பிடப்பட்டுள்ள நிறுவனங்களும் உள்ளன.

‘மூலோபாய முக்கியத்துவம் வாய்ந்த இரண்டாம் நிலை வணிகம்’ (Secondary Business of Strategic Importance) என்ற அந்தஸ்துடன் இந்த ஆண்டு 68 நிறுவனங்கள் பதிவு செய்யப்பட்டுள்ளன.

இந்த அந்தஸ்தைப் பெறும் நிறுவனங்களுக்கு நிறுவன வருமான வரிச் சலுகைகள் உள்ளிட்ட மேலதிக நன்மைகள் கிடைக்கின்றன.

ஆனால், Fortitude Innovations போன்ற சில நிறுவனங்கள் மிகக் குறைந்த ஆரம்பச் செலுத்தப்பட்ட மூலதனத்தையே கொண்டுள்ளன என பொதுநிதிக் குழு கண்டறிந்துள்ளது. சில நிறுவனங்களின் ஆரம்பச் செலுத்தப்பட்ட மூலதனம் வெறும் 2,500 அமெரிக்க டொலர்கள் மட்டுமே.

ஆணைக்குழுவின் பகிரங்கப் பதிவேட்டின்படி, பதிவு செய்யப்பட்டுள்ள பல நிறுவனங்கள் இலங்கையின் உள்ளூர் நிறுவனங்களுக்குச் சொந்தமான வெளிநாட்டுக் கடல்கடந்த நிறுவனங்களாகத் தோன்றுகின்றன.

உள்ளூர் நிறுவனங்கள் போர்ட் சிட்டியில் தொழில் நடத்துவதற்கு, நாட்டுக்கு வெளியே இருந்து டொலர் நிதியைக் கொண்டு தனியானதொரு நிறுவனத்தை உருவாக்க வேண்டும்.

போர்ட் சிட்டியில் வழங்கப்படும் வரி மற்றும் ஒழுங்குவிதிச் சலுகைகளைப் பெறுவதற்காக, நாட்டின் பிரதான நிலப்பகுதியில் இயங்கும் நிறுவனங்கள் தமது தொழில்களை அங்கு மாற்றிக்கொள்வதால் ஏற்படக்கூடிய வருவாய் இழப்பைத் தடுப்பதே இந்த விதியின் நோக்கமாகும்.

ஆனால், ஆணைக்குழுவின் முன்னாள் உறுப்பினர் இவற்றில் பல நிறுவனங்களை ‘வாய்ப்புவாதிகள்’ என்று வர்ணிக்கிறார்.

அதாவது, இந்நிறுவனங்கள் எப்படியிருந்தாலும் இலங்கைக்குச் சில வெளிநாட்டு முதலீடுகளைக் கொண்டுவந்திருக்கும். ஆனால், இப்போது அந்தப் பணத்தை வெளிநாட்டுக்கு நகர்த்தி, போர்ட் சிட்டியில் புதிய நிறுவனங்களை உருவாக்குகின்றன என்பது அவரது கருத்தாகும்.

போர்ட் சிட்டியில் உள்ள நிறுவனங்களுக்குச் சேவைகளை வழங்கும் வழக்கறிஞர் ஒருவரும் இதனை உறுதிப்படுத்தினார்.

குறிப்பாக, தொழில்நுட்பத் துறை மற்றும் வணிகச் செயல்முறை வெளியொப்படைப்பு (BPO) துறைகளில் இயங்கும், பல வெளிநாட்டு வாடிக்கையாளர்களைக் கொண்ட உள்ளூர் நிறுவனங்கள் போர்ட் சிட்டியில் புதிய நிறுவனங்களைத் திறந்துள்ளன.

உள்ளூர் நிறுவனங்கள் தமது தற்போதைய வணிகத்தை போர்ட் சிட்டிக்கு மாற்றுவதற்கான கட்டுப்பாடுகளைச் சமாளிக்க, அவை முதலில் நாட்டின் பிரதான நிலப்பகுதியில் இயங்கிய நிறுவனங்களில் பணியாற்றிய ஊழியர்களின் வேலை ஒப்பந்தங்களை முடிவுக்குக் கொண்டுவந்தன. பின்னர், அதே ஊழியர்களைப் போர்ட் சிட்டியில் உருவாக்கப்பட்ட புதிய நிறுவனங்களில் மீண்டும் பணியமர்த்தின.

“இது ஒரு புதிய வணிகம் என்று கூறி ஆணைக்குழுவிடம் வணிக முன்மொழிவைச் சமர்ப்பிக்கின்றனர். ஆனால், ஆணைக்குழு உண்மையில் இந்த விடயங்களை ஆழமாக ஆராய்வதில்லை” என்று அந்த வழக்கறிஞர் தெரிவித்தார்.

சந்தேகத்திற்குரிய சில நிறுவனங்கள்..

போர்ட் சிட்டியில் பதிவு செய்யப்பட்டுள்ள நிறுவனங்களில் சந்தேகத்திற்குரிய நிறுவனங்களும் இருப்பது மற்றொரு கவலையாக உள்ளது.

உதாரணமாக, போர்ட் சிட்டியில் பதிவு செய்யப்பட்டுள்ள Bitazza நிறுவனத்திற்கு எதிராக, உரிமம் இன்றி டிஜிட்டல் சொத்து பரிமாற்ற நிலையத்தை நடத்துவதாகக் கூறி தாய்லாந்தின் பிணையங்கள் மற்றும் பரிவர்த்தனை ஆணைக்குழு (Securities and Exchange Commission) குற்றவியல் முறைப்பாட்டைப் பதிவு செய்துள்ளது.

‘மூலோபாய முக்கியத்துவம் வாய்ந்த இரண்டாம் நிலை வணிகம்’ என்ற அந்தஸ்தைப் பெற்றிருந்த Clothespin Tower திட்டத்தின் கட்டுமானப் பணிகள் ஒருபோதும் ஆரம்பிக்கப்படவில்லை. தற்போது அந்தத் திட்டம் இரத்துச் செய்யப்பட்டுள்ளது.

துபாயிலும் இதே நிறுவனம் இதே பெயரில் கோபுரமொன்றை அமைப்பதாக வாக்குறுதி அளித்துவிட்டு, பின்னர் அங்கிருந்தும் மறைந்துவிட்டதாகத் தெரிகிறது.

2016ஆம் ஆண்டு, இலங்கை துறைமுக அதிகாரசபையின் தலைவராகப் பணியாற்றிய காலத்தில் இடம்பெற்றதாகக் கூறப்படும் ஊழல் தொடர்பில், Clothespin Tower நிறுவனத்தின் பிரதம நிறைவேற்று அதிகாரியான பிரியத் பந்து விக்கிரமவை இலஞ்ச ஊழல் விசாரணை ஆணைக்குழு விசாரணைக்கு உட்படுத்தியது.

கோட்டாபய ராஜபக்ஷவின் ஆட்சிக்காலத்தில், விக்கிரம போர்ட் சிட்டி பொருளாதார ஆணைக்குழுவின் உறுப்பினராகவும் பணியாற்றினார்.

Clothespin Tower திட்டத்திற்கான கடன் கிடைப்பதற்காகக் காத்திருப்பதாகவும், போர்ட் சிட்டியில் அபிவிருத்திப் பணிகளை மேற்கொள்வதற்கான அனுமதியைப் பெற மீண்டும் விண்ணப்பிக்கத் திட்டமிட்டுள்ளதாகவும் விக்கிரம The Examiner ஊடகத்திடம் தெரிவித்தார்.

சேவைகளை அடிப்படையாகக் கொண்ட விசேட பொருளாதார வலயங்கள் இணையவழிச் சூதாட்ட நிறுவனங்களை ஈர்ப்பது வழக்கமாகும்.

போர்ட் சிட்டியில் பதிவு செய்யப்பட்டுள்ள குறைந்தது ஒரு நிறுவனம், பந்தய நிறுவனமாகப் பதிவு செய்வதற்காக உள்நாட்டு இறைவரித் திணைக்களத்தை அணுகியுள்ளதாக அந்தத் திணைக்களத்தின் அதிகாரி ஒருவர் தெரிவித்தார்.

பிலிப்பைன்ஸில் அண்மையில் தடைசெய்யப்பட்ட பிலிப்பைன்ஸ் சூதாட்ட நிறுவனங்கள், தற்போது போர்ட் சிட்டியில் வேலைவாய்ப்புகளை விளம்பரப்படுத்தி வருகின்றன.

அண்மையில், போர்ட் சிட்டியில் பணியாற்றிய ஐந்து சீனப் பிரஜைகளை குடிவரவு அதிகாரிகள் நாடு கடத்தியதைத் தொடர்ந்து, இரண்டு நிறுவனங்களுக்கு விசா தொடர்பான ஆதரவை வழங்குவதை போர்ட் சிட்டி பொருளாதார ஆணைக்குழு இடைநிறுத்த வேண்டியிருந்தது.

தற்போது, நிறுவனங்களைப் பதிவு செய்வதற்கு முன்னர் அவற்றை ஆணைக்குழு மிகவும் நெருக்கமாக ஆராயத் தொடங்கியுள்ளது.

போர்ட் சிட்டி நிறுவனங்களுடன் பணியாற்றும் வழக்கறிஞர் கூறுகையில், தமது வாடிக்கையாளர்களுக்கு நிறுவனங்களின் வணிகச் செயற்பாடுகள் தொடர்பாக மேலதிக விவரங்களைக் கோரும் மின்னஞ்சல்கள் கிடைத்துள்ளன.

ஆணைக்குழு திடீர் தணிக்கைகளையும் மேற்கொண்டு வருகிறது.

முதலீட்டாளர்களின் நம்பிக்கையை வெல்ல அரசாங்கம் என்ன செய்ய வேண்டும்?

முதலீட்டாளர்களின் நம்பிக்கையைப் பெறுவதற்கு, அரசாங்கம் போர்ட் சிட்டித் திட்டத்திற்கு உறுதியான ஆதரவை வழங்குவதுடன், அதனைப் பகிரங்கமாகவும் வெளிப்படுத்த வேண்டும் என்று ஆணைக்குழுவின் முன்னாள் உறுப்பினர் கூறுகிறார்.

கொள்கை நிலைத்தன்மை மட்டுமே இதற்குப் போதுமானதல்ல என்பது அவரது கருத்தாகும்.

இந்த மாதத்தின் தொடக்கத்தில், ஜனாதிபதி அநுர குமார திசாநாயக்க அத்தகைய ஆதரவை வெளிப்படுத்தியிருக்கலாம்.

வர்த்தகச் சம்மேளனத்தின் முதலீட்டு மாநாட்டில் நிறைவுரையாற்றிய அவர், துறைமுகங்கள், புதுப்பிக்கத்தக்க எரிசக்தி, போர்ட் சிட்டி, சுற்றுலாத்துறை மற்றும் உட்கட்டமைப்பு அபிவிருத்தி உள்ளிட்ட பல துறைகளில் புதிய பொருளாதார வாய்ப்புகள் உருவாக்கப்பட்டு வருவதாகக் குறிப்பிட்டார்.

“நீங்கள் அனைவரும் அச்சமின்றி முதலீடு செய்யலாம். அதற்குத் தேவையான பாதுகாப்பையும் நம்பிக்கையையும் நாங்கள் உறுதிப்படுத்துவோம்” என்று அவர் தெரிவித்தார்.

போர்ட் சிட்டி: நீண்டகாலத் திட்டம்

போர்ட் சிட்டிக்காக அரசாங்கம் நீண்டகாலத் திட்டங்களை வகுத்துள்ளது.

ஆரம்பத்தில், கடலோரத்தில் அமைந்துள்ள சொத்துச் சந்தை அபிவிருத்தித் திட்டமாக மட்டுமே இது கருதப்பட்டது.

பின்னர், நல்லாட்சி அரசாங்கத்தின் காலத்தில், இந்தப் பகுதியை சர்வதேச நிதி மையமாக மாற்ற முடிவு செய்யப்பட்டது.

அதன் பின்னர், சேவைகளை அடிப்படையாகக் கொண்ட விசேட ஏற்றுமதி வலயமாக மாற்றும் நோக்கத்துடன் திட்டம் மறுவடிவமைக்கப்பட்டது. தற்போதும் இதே நோக்கமே தொடர்கிறது.

போர்ட் சிட்டி, ஜனாதிபதியால் நியமிக்கப்படும் போர்ட் சிட்டி பொருளாதார ஆணைக்குழுவினால் நிர்வகிக்கப்படுகிறது.

சில சட்டங்கள் போர்ட் சிட்டிக்குள் நடைமுறைக்குப் பொருந்தாததால், அமைச்சரவையின் ஒப்புதலுடன் அந்த வலயத்தை ஒழுங்குபடுத்தும் அதிகாரத்தை ஆணைக்குழு கொண்டுள்ளது.

முதலீட்டாளர்களை ஈர்ப்பதும் இந்த ஆணைக்குழுவின் பொறுப்பாகும். இதற்காக அது நான்கு முக்கிய வழிமுறைகளைப் பயன்படுத்துகிறது.

1. ஒரே இடத்தில் அனைத்து அனுமதிகளையும் பெறும் முறை

புதிய தொழிலை ஆரம்பிப்பதற்குத் தேவையான அனுமதிகளைப் பெறுவதற்காக, ஒவ்வொரு அரசாங்க நிறுவனத்தையும் தனித்தனியாக அணுக வேண்டிய தேவையை நீக்கும் வகையில், ஆணைக்குழு ஒரே இடத்தில் அனைத்து சேவைகளையும் வழங்குகிறது.

இதன் மூலம் தொழில் ஆரம்பிக்கும் நடைமுறை எளிதாக்கப்படுகிறது.

2. வெளிநாட்டவர்களுக்கு இலகுவான வேலை விசாக்கள்

போர்ட் சிட்டியில் வெளிநாட்டவர்களுக்கு வேலை விசாக்களைப் பெறுவது மிகவும் எளிதாக்கப்பட்டுள்ளது.

இந்த விசா வசதி, நிறுவனங்களை ஈர்ப்பதில் மிக முக்கியமான காரணிகளில் ஒன்றாகும் என்று போர்ட் சிட்டியில் நிறுவனங்களை அமைப்பதற்கு உதவும் D.L. & F. De Saram சட்ட நிறுவனத்தின் முகாமைத்துவப் பங்காளரான சவந்த டி சரம் தெரிவித்தார்.

பொதுவாக, இலங்கையில் வெளிநாட்டுப் பணியாளர்களை வேலைக்கு அமர்த்துவதற்கு, அந்தப் பணிகளுக்குப் போதுமான உள்ளூர் திறமையாளர்கள் இல்லை என்பதை நிறுவனம் நிரூபிக்க வேண்டும்.

மேலும், வழக்கமாக நான்கு அல்லது ஐந்து வெளிநாட்டுப் பணியாளர்களுக்கே வேலை விசா பெற முடியும்.

ஆனால், போர்ட் சிட்டி பொருளாதார ஆணைக்குழு நூற்றுக்கணக்கான விசாக்களை வழங்கத் தயாராக உள்ளது.

இதுவரை, போர்ட் சிட்டியில் உள்ள நிறுவனங்களுக்கு 14,300 விசாக்கள் வழங்கப்பட்டுள்ளதாக நாடாளுமன்றத்தின் பொதுநிதிக் குழுவின் விசாரணையொன்றில் தெரிவிக்கப்பட்டது.

3. சில சட்டங்களிலிருந்து விலக்குகள்

போர்ட் சிட்டியில் இயங்கும் நிறுவனங்களுக்கு சில சட்டங்களிலிருந்து விலக்குகளை வழங்கும் அதிகாரத்தையும் ஆணைக்குழு கொண்டுள்ளது.

உதாரணமாக, கேளிக்கை வரி செலுத்துவதைக் கட்டாயமாக்கும் சட்டங்கள் மற்றும் ஊழியர்களைப் பணிநீக்கம் செய்வதைக் கட்டுப்படுத்தும் சட்டங்கள் போன்றவற்றிலிருந்து சில விலக்குகள் வழங்கப்படுகின்றன.

இத்தகைய வேறுபாடுகள், போர்ட் சிட்டிக்குள் தொழில் நடத்துவதை எளிதாக்குகின்றன.

4. வரிச் சலுகைகள்

மூலோபாய முக்கியத்துவம் வாய்ந்தவை எனக் கருதப்படும் நிறுவனங்களுக்கு வரி விலக்குகளும் சலுகை வரி விகிதங்களும் வழங்கப்படுகின்றன.

முதன்மை அல்லது இரண்டாம் நிலை ‘மூலோபாய முக்கியத்துவம் வாய்ந்த வணிகம்’ என்ற அந்தஸ்தைப் பெறும் நிறுவனங்கள் இத்தகைய சலுகைகளைப் பெறுகின்றன.

2021ஆம் ஆண்டு போர்ட் சிட்டி பொருளாதார ஆணைக்குழுச் சட்டம் முதன்முதலில் நிறைவேற்றப்பட்டபோது, 25 ஆண்டுகள் வரையிலான வரி விடுமுறைகள் உள்ளிட்ட மிக விரிவான சலுகைகள் வழங்கப்பட்டன.

ஆரம்பத்தில் பதிவு செய்த நிறுவனங்கள் இந்த வரிச் சலுகைகளைப் பெற்றுக்கொண்டன.

ஆனால், ஜனவரி மாதத்தில் செய்யப்பட்ட திருத்தங்களுக்குப் பின்னர், புதிதாகப் பதிவு செய்யும் பல நிறுவனங்களுக்கு வழங்கப்படும் சலுகைகள் மட்டுப்படுத்தப்பட்டன.

உதாரணமாக, 25 ஆண்டுகள் வரி விடுமுறை வழங்கும் திட்டம், வணிகத்தின் வகை மற்றும் முதலீட்டின் அளவைப் பொறுத்து 15, 12, 10 மற்றும் நான்கு ஆண்டுகள் என மாற்றப்பட்டது.

போர்ட் சிட்டியில் தொழில் ஆரம்பிக்கும் சேவைத் துறை நிறுவனங்களுக்கு, சலுகை அடிப்படையில் 7.5 சதவீத நிறுவன வருமான வரி விதிக்கப்படுகிறது.

இதனுடன் ஒப்பிடுகையில், இலங்கையின் பிரதான நிலப்பகுதியில் வெளிநாட்டு நாணயத்தில் ஈட்டப்படும் சேவை ஏற்றுமதி வருமானத்திற்கு 15 சதவீத நிறுவன வருமான வரி விதிக்கப்படுகிறது.

(நன்றி: த எக்ஸாமினர்