கடந்த ஒக்டோபர் 16ஆம் திகதி, எந்தவொரு தனிநபருக்கும் சலுகை வழங்குவதற்காகச் சட்டத்தை வளைக்கவோ திருத்தவோ போவதில்லை என்று இலங்கை அரசாங்கத்தின் அமைச்சரவைப் பேச்சாளர் தெரிவித்தார். ஆனால், நான்கு நாட்களுக்குப் பின்னர், சிறையில் அடைக்கப்பட்டுள்ள ஒரு பௌத்த பிக்குவைச் சுற்றிய சர்ச்சையின் மையமாக இருந்த சிறை விதிகளை அரசாங்கம் திருத்தியது.
இலங்கை அரசாங்க வர்த்தமானி இலக்கம் 2511/30 மூலம் வெளியிடப்பட்ட திருத்தங்களின்படி, சிறையில் அடைக்கப்படும் ஒரு பௌத்த பிக்கு தனது காவியுடையை இழக்க வேண்டுமா என்பதைத் தீர்மானிப்பதில் பௌத்த மகா சங்கத்தின் பீடங்களுக்கு இறுதி முடிவெடுக்கும் அதிகாரம் வழங்கப்பட்டுள்ளது. அத்துடன், தண்டனை பெற்ற பிக்குகள் சிறையிலிருந்து வெளியே அழைத்துச் செல்லப்படும்போது, நீதிமன்றத்திற்குக் கொண்டு செல்லப்படுவது உட்பட, காவியுடை அணியவும் அனுமதிக்கப்படுகிறது. தேவையான மாற்றங்களுடன் ஏனைய மதங்களின் குருமார்களுக்கும் இந்த விதிகள் பொருந்தும்.
இதன் மூலம், கடும்போக்கு சிங்கள பௌத்த தேசியவாதப் பிக்குவான கலகொட அத்தே ஞானசார தேரரை மையமாகக் கொண்டு அரசாங்கத்திற்கும் நாட்டின் மூத்த பௌத்த மதத் தலைவர்களுக்கும் இடையில் இரண்டு வாரங்களாக நீடித்த மோதல் முடிவுக்கு வந்துள்ளது.
ஒக்டோபர் 6ஆம் திகதி, கொழும்பு மேல் நீதிமன்றத்தில் ஞானசார தேரர் சிறை உடையில் முன்னிலைப்படுத்தப்பட்டார். அதற்கு முன்னர், நடைமுறையிலிருந்த சிறை உத்தரவுகளின்படி சிறை அதிகாரிகள் அவரது காவியுடையை அகற்றியிருந்தனர். ஆரம்பத்தில், இந்த விதிகள் அனைத்து கைதிகளுக்கும் ஒரே மாதிரியாகப் பொருந்தும் என்று அரசாங்கம் தெரிவித்திருந்தது.
வர்த்தமானி என்ன கூறுகிறது?
சிறைச்சாலைகள் கட்டளைச் சட்டத்தின் கீழ், நீதியமைச்சர் ஹர்ஷன நாணயக்காரவின் ஒப்புதலுடன், சிறைச்சாலைகள் ஆணையாளர் நாயகத்தினால் இந்த உத்தரவுகள் பிறப்பிக்கப்பட்டன. பதில் கடமையாற்றும் ஆணையாளர் நாயகமான ஆர். பிரசாத் ஹேமந்த குமார, ஒக்டோபர் 19ஆம் திகதி இவற்றில் கையொப்பமிட்டார்.
புதிய நிலையான உத்தரவு 356A-இன்படி, ஒரு பௌத்த பிக்கு சிறையில் அடைக்கப்படும்போது, அவர் சிறைக்கு வரும்போது அணிந்திருந்த காவியுடையை அகற்றுவது தொடர்பாக ஆணையாளர் நாயகம் பௌத்த விவகாரத் திணைக்களத்துடன் கலந்தாலோசிக்க வேண்டும்.
அந்தத் திணைக்களம், குறித்த பிக்கு சார்ந்த நிகாயம் அல்லது பௌத்த பீடத்துக்கு இதுபற்றி அறிவிக்க வேண்டும். அந்தப் பீடம் எடுத்த நடவடிக்கை தொடர்பான அறிக்கையைப் பத்து நாட்களுக்குள் ஆணையாளர் நாயகத்திடம் சமர்ப்பிக்க வேண்டும்.
குறித்த காலப்பகுதிக்குள் பதில் கிடைக்காவிட்டால், “தொடர்புடைய விதிகளுக்கு அமைவாக” ஆணையாளர் நாயகம் நடவடிக்கை எடுக்கலாம் என உத்தரவு குறிப்பிடுகிறது. ஆனால், அந்தத் தொடர்புடைய விதிகள் எவை என்பது அதில் தெளிவாகக் குறிப்பிடப்படவில்லை.
நிலையான உத்தரவு 550இல் மேற்கொள்ளப்பட்ட திருத்தத்தின்படி, கைதியாகச் சிறையிலிருந்து வெளியே அழைத்துச் செல்லப்படும் ஒரு பிக்கு, சிறையில் அடைக்கப்பட்டபோது அணிந்திருந்த காவியுடையை அணிய அனுமதிக்கப்படுகிறார்.
அவரது பௌத்த பீடம் அதற்கு அனுமதி வழங்கவில்லை என்றால், ஆணையாளர் நாயகம் “தேவையான நடவடிக்கைகளை” எடுக்க வேண்டும். மேலும், ஒரு பிக்கு சிறையில் அடைக்கப்பட்ட ஏழு வேலை நாட்களுக்குள், அவரது பீடத்தின் அனுமதியைப் பெறுவதற்கான நடவடிக்கைகளை மேற்கொள்ளுமாறு பௌத்த விவகாரத் திணைக்களத்திடம் ஆணையாளர் நாயகம் கோர வேண்டும்.
எனினும், பிக்குவின் காவியுடை தொடர்பாக அவரது பீடம் தீர்மானிக்கும் வரை, அவர் சிறைக்குள் என்ன உடையை அணிய வேண்டும் என்பது குறித்து இந்த உத்தரவு எதையும் குறிப்பிடவில்லை.
அரசாங்கம் என்ன கூறியது?
ஒக்டோபர் 6ஆம் திகதி, ஞானசார தேரர் காவியுடை இன்றி நீதிமன்றத்தில் முன்னிலைப்படுத்தப்பட்ட நாளன்று, அமைச்சரவைப் பேச்சாளர் நளிந்த ஜயதிஸ்ஸ, சிறை அதிகாரிகள் சிறைச்சாலைகள் கட்டளைச் சட்டத்தின்படியே செயற்பட்டதாகத் தெரிவித்தார்.
அப்போது சிறைத்தண்டனை அனுபவித்துக் கொண்டிருந்த 63 பௌத்த பிக்குகளுக்கும் இதே நடைமுறைதான் பொருந்துவதாக அவர் கூறினார்.
சிறைச்சாலைகள் திணைக்களத்தின் பேச்சாளர் சேனக பல்லேதென்னவும், கடூழியச் சிறைத்தண்டனை விதிக்கப்பட்ட கைதிகள் தங்களுடைய சமூக அந்தஸ்து எதுவாக இருந்தாலும் சிறை உடையையே அணிய வேண்டும் என்று தெரிவித்தார்.
இரண்டு நாட்களுக்குப் பின்னர், ஜனாதிபதி அநுர குமார திஸாநாயக்க, ஜனாதிபதி செயலகத்தில் மூத்த பௌத்த பிக்குகளைச் சந்தித்தபோது, சிறைச் சட்டங்களை மீறி அதிகாரிகள் செயற்படுமாறு தாம் உத்தரவிடப் போவதில்லை என்று கூறினார்.
பொருத்தமற்ற விதிகள் இருப்பின், உரிய சட்ட நடைமுறையின் ஊடாக அவற்றைத் திருத்த வேண்டும் என்றும் அவர் தெரிவித்தார்.
“எனது தனிப்பட்ட விருப்பங்கள் சட்டமாக மாறிவிடக் கூடாது” என்று அவர் கூறியதாக டெய்லி மிரர் செய்தி வெளியிட்டது.
ஏனைய தண்டனை பெற்ற பிக்குகளும் இதே விதிக்கு உட்பட்டவர்கள் என்பதையும், ஞானசார தேரர் 2018ஆம் ஆண்டு முன்னர் சிறையில் இருந்தபோதும் சிறை உடையை அணிந்திருந்தார் என்பதையும் ஜனாதிபதி சுட்டிக்காட்டினார்.
அதே சந்திப்பில், தற்போதைய நிலையான சிறை உத்தரவுகள் காலத்திற்குப் பொருந்தாதவை என்று குறிப்பிட்ட ஜனாதிபதி, அவற்றை மீளாய்வு செய்து திருத்துவதற்காகக் குழுவொன்றை நியமித்தார். சட்டத் திருத்தங்களை இரண்டு வாரங்களுக்குள் நிறைவு செய்யுமாறு நீதியமைச்சரிடம் பொறுப்பு ஒப்படைக்கப்பட்டது.
புத்தசாசன அமைச்சின் செயலாளர் டபிள்யூ. பி. சேனதீர தலைமையிலான குழு, தனது இடைக்கால அறிக்கையை ஒக்டோபர் 14ஆம் திகதி நீதியமைச்சரிடம் கையளித்தது. இதையடுத்து, நிலையான சிறை உத்தரவுகளைத் திருத்துமாறு பதில் கடமையாற்றும் சிறைச்சாலைகள் ஆணையாளர் நாயகத்துக்கு நீதியமைச்சர் நாணயக்கார அறிவுறுத்தினார்.
ஒக்டோபர் 16ஆம் திகதி, ஞானசார தேரரை விடுதலை செய்யுமாறு கோரி கண்டியிலிருந்து கொழும்பு வரை பிக்குகள் பேரணியாக வந்திருந்த நிலையில், ஜயதிஸ்ஸ மீண்டும் அரசாங்கத்தின் நிலைப்பாட்டை வலியுறுத்தினார்.
முந்தைய அரசாங்கங்களின் காலத்தில் சட்டம் சமத்துவமின்றிப் பயன்படுத்தப்பட்டதற்கு எதிரான அதிருப்தியும், ஜனாதிபதிக்கும் அரசாங்கத்திற்கும் மூன்றில் இரண்டு பெரும்பான்மையை மக்கள் வழங்கியதற்கான காரணங்களில் ஒன்றாகும் என்று அவர் கூறினார்.
எனவே, ஒருவரின் அடையாளம் அல்லது சமூக அந்தஸ்தின் அடிப்படையில் விதிவிலக்குகளை வழங்க முடியாது என்றும் அவர் தெரிவித்தார்.
விவசாய அமைச்சர் கே. டி. லால் காந்தவும், நீதிமன்றத் தீர்ப்புக்கு மாறாக ஒரு பிக்குவை விடுதலை செய்யும் அதிகாரம் ஜனாதிபதிக்கோ அரசாங்கத்திற்கோ இல்லை என்று கூறினார்.
விதியும் விதிவிலக்கும்:
அரசாங்க அதிகாரிகள் இரண்டு கோரிக்கைகளையும் வெவ்வேறாகப் பார்க்கின்றனர்.
ஞானசார தேரருக்கு மீண்டும் ஜனாதிபதி மன்னிப்பு வழங்குவதற்கு அரசாங்கம் மறுத்துள்ளது. அதேவேளை, பிக்குகள் அணியும் காவியுடை தொடர்பான விதிகளை மாற்றுவதற்கு இணங்கியுள்ளது.
ஞானசார தேரருக்கு விதிக்கப்பட்ட சிறைத்தண்டனை தொடர்கிறது. புதிய உத்தரவுகள் சிறையில் உள்ள அனைத்து பிக்குகளுக்கும், ஏனைய மதங்களைச் சேர்ந்த குருமார்களுக்கும் பொருந்தும்.
எனினும், இந்த விதி பல ஆண்டுகளாக நடைமுறையில் இருந்துள்ளது. 2018ஆம் ஆண்டில் ஞானசார தேரருக்கும் இது பயன்படுத்தப்பட்டது. அப்போது இந்த விதிகளை மீளாய்வு செய்ய வேண்டும் என்ற கோரிக்கை எழவில்லை.
ஆனால், பௌத்த மதத் தலைவர்கள் எதிர்ப்புத் தெரிவித்த இரண்டு நாட்களுக்குள் அரசாங்கம் இந்த விதியை மீளாய்வு செய்யத் தொடங்கியது.
ஏனைய சமூகத்தினர் தங்களது மத உடைகள் தொடர்பான விதிகளை மாற்றுமாறு விடுத்த கோரிக்கைகள் இதைவிட மெதுவாகவே கையாளப்பட்டுள்ளன.
ஒகஸ்ட் மாதம், கல்முனை வடக்கு ஆதார வைத்தியசாலையில் பணியாற்றும் முஸ்லிம் சுகாதார உதவியாளர்கள், மத அடையாளம் கொண்ட உடைகளை அணிந்து பணியாற்றுவதற்குத் தடை விதிக்கப்பட்டுள்ளதாகத் தெரிவித்தனர்.
சுகாதார அமைச்சராகவும் பதவி வகிக்கும் ஜயதிஸ்ஸ, விதிகளில் மாற்றம் செய்வது குறித்து முறையாகப் பரிசீலித்து ஒப்புதல் அளிக்கப்படும் வரை, 2019ஆம் ஆண்டின் சுற்றறிக்கையைப் பின்பற்றுமாறு அவர்களிடம் கூறினார்.
பிக்குவும் பௌத்த மதத் தலைவர்களும்…
நீதிமன்ற அவமதிப்பு மற்றும் 2010ஆம் ஆண்டு காணாமல் ஆக்கப்பட்ட கேலிச்சித்திரக் கலைஞர் பிரகீத் எக்னெலிகொடவின் மனைவி சந்தியா எக்னெலிகொடவை குற்றவியல் ரீதியாக அச்சுறுத்தியமை ஆகிய குற்றச்சாட்டுகளின் அடிப்படையில், 2018ஆம் ஆண்டு ஞானசார தேரருக்கு ஆறு ஆண்டுகள் சிறைத்தண்டனை விதிக்கப்பட்டது.
2019ஆம் ஆண்டு, அப்போதைய ஜனாதிபதி மைத்திரிபால சிறிசேன அவருக்கு மன்னிப்பு வழங்கினார். அப்போது ஞானசார தேரர் சுமார் ஒன்பது மாதங்களே சிறையில் இருந்திருந்தார்.
எனினும், செப்டெம்பர் 10ஆம் திகதி, உச்ச நீதிமன்றம் அந்த ஜனாதிபதி மன்னிப்பை இரத்துச் செய்தது. இதையடுத்து, சில வாரங்களுக்குப் பின்னர் அவர் மீண்டும் கைது செய்யப்பட்டார்.
பிரதான பௌத்த பீடங்களின் மகாநாயக்கர்கள், ஒரு பிக்குவின் காவியுடையை அகற்றுவது சிறை நிர்வாகம் தொடர்பான சாதாரண விடயமாகவோ சிறை விதிகளால் மட்டும் தீர்மானிக்கப்பட வேண்டிய விடயமாகவோ கருத முடியாது என்று சிறைச்சாலைகள் ஆணையாளர் நாயகத்துக்குக் கடிதம் எழுதினர்.
பின்னர், சிறை அதிகாரிகளிடம் காவியுடையை ஒப்படைப்பதற்கு முன்பு, இரண்டு மணித்தியாலங்களுக்கும் மேலாகத் தான் எதிர்ப்புத் தெரிவித்ததாக ஞானசார தேரர் தனது சட்டத்தரணியிடம் கூறினார்.
புதிய விதிகளுக்கான முதல் சோதனை
திருத்தப்பட்ட புதிய விதிகள் ஒக்டோபர் 23ஆம் திகதி முதன்முறையாகப் பயன்படுத்தப்படவிருந்தன. அன்றைய தினம், இஸ்லாத்தை அவமதிக்கும் வகையில் கருத்துத் தெரிவித்ததாகக் கூறப்படும் மற்றொரு வழக்கில், ஞானசார தேரர் கொழும்பு மேல் நீதிமன்றத்தில் முன்னிலையாக வேண்டியிருந்தது.
திருத்தப்பட்ட விதிகளின்படி அவர் காவியுடை அணிந்தே நீதிமன்றத்தில் முன்னிலையாவார் என்று புத்தசாசன அமைச்சர் ஹினிதும சுனில் செனவி முன்னதாகத் தெரிவித்திருந்தார்.
ஆனால், வழக்கு தொடர்பாக நிலவிய பதற்றம் மற்றும் குழப்பங்கள் ஏற்படக்கூடும் என்ற அச்சம் காரணமாக, ஞானசார தேரரை மின்னணு வழிமுறையின் ஊடாக நீதிமன்றத்தில் முன்னிலைப்படுத்தப் போவதாகச் சிறை அதிகாரிகள் நீதிமன்றத்துக்குத் தெரிவித்தனர்.
அவரது சட்டத்தரணி அசோக வீரசூரிய, கோட்டே பௌத்த பீடத்தின் மகாநாயக்கர், ஞானசார தேரருக்கு மீண்டும் சம்பிரதாயபூர்வமாகக் காவியுடை அணிவிக்கும் நிகழ்வொன்றை நடத்துமாறு சிறை அதிகாரிகளிடம் கோரியிருந்ததாகத் தெரிவித்தார்.
இதற்குப் பதிலளித்த நீதிபதி புத்திக சி. ராகல, அவ்வாறு செய்வதற்கு நீதிமன்றத்திற்கு அதிகாரம் இல்லை என்று கூறினார்.
அத்துடன், சிறையில் அடைக்கப்படும் ஒவ்வொரு பிக்குவும் நீதிமன்றத்தில் முன்னிலைப்படுத்தப்படுவதற்கு முன்னர், பௌத்த மதத் தலைவர்களால் காவியுடை அணிவிக்கப்பட வேண்டிய நிலை ஏற்படுமா என்றும் அவர் கேள்வி எழுப்பினார்.
