இந்தியாவில் கோலா ஜாம்பவான்களுக்குக் கடும் போட்டியாக உருவெடுக்கும் சீரகச் சோடா பானங்கள்!

இந்தியாவில் கோலா ஜாம்பவான்களுக்குக் கடும் போட்டியாக உருவெடுக்கும் சீரகச் சோடா பானங்கள்!

~ நிகில் இனாம்தார் | பிபிசி

இந்தியாவில் கோகா கோலா, பெப்சி போன்ற உலகப் புகழ்பெற்ற குளிர்பான நிறுவனங்களுக்குப் புதிய போட்டியாளர்கள் உருவாகியிருக்கிறார்கள். அவர்கள் பன்னாட்டு நிறுவனங்கள் அல்ல. இந்தியாவின் பாரம்பரியச் சுவையான சீரகத்தைக் கொண்டு சோடா தயாரிக்கும் உள்நாட்டு நிறுவனங்கள்தான்.

ஒரு சமையலறையில் தற்செயலாகத் தொடங்கிய முயற்சி, இன்று பல கோடி டொலர் வருவாய் ஈட்டும் வர்த்தகமாக வளர்ந்திருக்கிறது. இந்த மாற்றத்தின் பின்னணியில் சுவாரசியமான ஒரு தொழில் முயற்சிக் கதையும் இருக்கிறது.

சமையலறையில் பிறந்த புதிய குளிர்பானம்:

இந்தியாவின் வடமேற்கு மாநிலமான பஞ்சாப்பைச் சேர்ந்த சௌரப் முஞ்சால், நிகில் டோடா, சௌரப் பூட்னா ஆகிய மூவரும் உறவினர்கள்.

ஒருநாள் இரவு உணவுக்குப் பின்னர், வீட்டில் வழக்கம்போலப் பேசிக்கொண்டிருந்தபோது, சமையலறையில் கிடைத்த பொருட்களைக் கொண்டு ஒரு புதிய பானத்தைத் தயாரிக்க முயன்றனர்.

அப்போது நிகில் டோடா, சீரகம் சேர்த்து புளிப்பும் காரமும் கலந்த ஒரு சோடா பானத்தைத் தயாரித்தார்.

அதன் தனித்துவமான மணமும் சுவையும் மூவரையும் கவர்ந்தன.

வீட்டில் தயாரித்த இந்தப் பானத்தை வணிக ரீதியாக விற்பனை செய்தால் என்ன என்ற யோசனை அவர்களுக்குத் தோன்றியது.

இந்தியாவில் சீரகச் சோடா ஒன்றும் புதிய பானமல்ல. நீண்டகாலமாக வீதியோரக் கடைகளில் அது விற்பனை செய்யப்பட்டு வந்தது. ஆனால், பெரும்பாலும் சிறிய உள்ளூர் நிறுவனங்களே இந்தச் சந்தையில் ஈடுபட்டிருந்தன.

சீரகச் சுவையை அடிப்படையாகக் கொண்டு பெரிய அளவில் ஒரு குளிர்பான வர்த்தக நாமத்தை உருவாக்கியவர்கள் மிகக் குறைவாகவே இருந்தனர்.

இந்த வாய்ப்பைப் பயன்படுத்த முடிவு செய்த மூவரும், தமது குடும்பத்தினரை முதலீடு செய்யச் சம்மதிக்க வைத்தனர்.

2017ஆம் ஆண்டில் ‘லாஹோரி ஜீரா’ (Lahori Zeera) என்ற குளிர்பானத்தை அறிமுகப்படுத்தினர்.

இந்தி மொழியில் ‘ஜீரா’ என்றால் சீரகம் என்று பொருள்.

பத்து ரூபாய் சோடா: பல கோடி டொலர் வர்த்தகம்:

ஏறத்தாழ பத்து ஆண்டுகளுக்குப் பின்னர், லாஹோரி ஜீரா இந்தியக் குளிர்பானச் சந்தையில் குறிப்பிடத்தக்க இடத்தைப் பிடித்துள்ளது.

குறிப்பாக, இந்தியாவில் அதிக அளவில் விற்பனையாகும் 10 ரூபாய் விலையிலான குளிர்பானப் பிரிவில், கோகா கோலா மற்றும் பெப்சி போன்ற நிறுவனங்களுக்கு இது கடுமையான போட்டியை ஏற்படுத்தியுள்ளது.

இந்திய ரூபாய் 10 என்பது சுமார் 0.11 அமெரிக்க டொலர் அல்லது 0.078 பிரித்தானிய பவுண்டுக்குச் சமமானது.

2026ஆம் ஆண்டின் இறுதிக்குள் லாஹோரி ஜீரா நிறுவனத்தின் வருவாய் 11.5 கோடி முதல் 12 கோடி அமெரிக்க டொலர் வரை இருக்கும் என்று எதிர்பார்க்கப்படுகிறது.

இந்த வளர்ச்சிக்கு என்ன காரணம்?

இந்தியர்கள் தங்களுக்குப் பழக்கமான பாரம்பரியச் சுவைகளை மீண்டும் விரும்பத் தொடங்கியிருப்பதும், ஆரோக்கியமானவை என்று கருதப்படும் குளிர்பானங்களை நாடுவதும் முக்கிய காரணங்கள் என்று சந்தை ஆய்வாளர்கள் கூறுகின்றனர்.

இருப்பினும், பாரம்பரியச் சுவை கொண்டிருப்பதால் மட்டுமே ஒரு சீனி கலந்த குளிர்பானம் ஆரோக்கியமானதாகிவிடாது என்பதையும் கவனத்தில் கொள்ள வேண்டும்.

இந்தியா முழுவதும் பரவும் சீரகச் சோடா மோகம்

லாஹோரி ஜீராவின் வெற்றி தனித்த நிகழ்வல்ல.

கடந்த பத்தாண்டுகளில் இந்தியாவின் பல பகுதிகளில் சீரகச் சுவையுள்ள சோடா பானங்கள் சந்தைக்கு வந்துள்ளன.

அவற்றில் முக்கியமானவை:

  • மும்பையைச் சேர்ந்த Xotik Frujus நிறுவனத்தின் ‘ஜீரு’ (Jeeru).
  • கோடீஸ்வரத் தொழிலதிபர் முகேஷ் அம்பானிக்குச் சொந்தமான காம்பா கோலாவின் ‘காம்பா ஜீரா’ (Campa Jeera).
  • ஹவுஸ் ஒஃப் பிந்து நிறுவனத்தின் ‘ஃபிஸ் ஜீரா மசாலா’ (Fizz Jeera Masala).
  • பார்லே அக்ரோ நிறுவனத்தின் ‘திஷூம்’ (Dhishoom).

இவற்றுடன் பல பிராந்திய நிறுவனங்களும் சீரகச் சோடா தயாரிப்பில் ஈடுபட்டுள்ளன.

ஹவுஸ் ஒஃப் பிந்து நிறுவனம் சுமார் 25 ஆண்டுகளுக்கு முன்னரே சீரகச் சோடாவை அறிமுகப்படுத்தியிருந்தது. ஆனால், சில ஆண்டுகளுக்கு முன்னர் வரை அதன் விற்பனை பெரிய அளவில் வளரவில்லை.

இப்போது அந்த நிலைமை மாறியுள்ளது.

நிறுவனத்தின் இயக்குநர்களில் ஒருவரான மேகா சங்கர் பிபிசியிடம் கூறுகையில்,

“கார்பனேற்றப்பட்ட குளிர்பானங்களில் தற்போது மிக வேகமாக வளர்ந்து வரும் பிரிவு சீரகச் சோடாதான். கடந்த ஐந்து ஆண்டுகளில் எமது மொத்த வருவாயில் இதன் பங்களிப்பு 20 சதவீதத்திலிருந்து 40 சதவீதமாக இரட்டிப்பாகியுள்ளது” என்றார்.

இருபது ஆண்டுகளுக்கும் மேலாகத் தென்னிந்தியாவை மையமாகக் கொண்டு இயங்கிய இந்த நிறுவனம், அதிகரித்து வரும் தேவையைத் தொடர்ந்து இந்தியா முழுவதும் தனது விற்பனையை விரிவுபடுத்தி வருகிறது.

இந்தியாவின் பழைமையான நுகர்வோர் வர்த்தக நாமங்களில் ஒன்றான பார்லே அக்ரோ, 2012ஆம் ஆண்டு முதல் கிராமப்புறங்களில் மட்டும் விற்பனை செய்து வந்த திஷூம் சீரகச் சோடாவைக் கடந்த ஆண்டு நாடு முழுவதும் அறிமுகப்படுத்தியது.

இந்திய இணையவழி விநியோக நிறுவனமொன்றின் அறிக்கையின்படி, இந்தக் கோடைக்காலத்தில் இத்தகைய குளிர்பானங்களுக்கான இணையவழி முன்பதிவுகள் 900 சதவீதம் அதிகரித்துள்ளன.

கோகா கோலா, பெப்சியின் சந்தைப் பங்கு சரிவு:

சீரகச் சோடா பானங்களின் வளர்ச்சி, இந்தியாவின் குளிர்பானச் சந்தையில் குறிப்பிடத்தக்க மாற்றத்தை ஏற்படுத்தி வருகிறது.

2024ஆம் ஆண்டில் இந்தியாவின் மதுபானமற்ற பானச் சந்தையின் மதிப்பு 3,200 கோடி அமெரிக்க டொலராக இருந்தது. 2033ஆம் ஆண்டுக்குள் இந்தச் சந்தை இரட்டிப்பாகும் என்று கணிக்கப்பட்டுள்ளது.

கோடக் மியூச்சுவல் ஃபண்ட் நிறுவனம் இந்த ஆண்டின் தொடக்கத்தில் வெளியிட்ட அறிக்கையின்படி, லாஹோரி ஜீரா, காம்பா மற்றும் பிற சிறிய நிறுவனங்கள் அடங்கிய இந்தியப் பாரம்பரியப் பானங்களின் சந்தைப் பங்கு, 2025 செப்டம்பருக்குள் இரட்டிப்பாகி சுமார் 15 சதவீதத்தை எட்டியுள்ளது.

அதேவேளையில், கோகா கோலா மற்றும் பெப்சிகோ நிறுவனங்களின் கூட்டுச் சந்தைப் பங்கு சுமார் 93 சதவீதத்திலிருந்து 85 சதவீதமாகக் குறைந்துள்ளது.

இந்தியாவின் கார்பனேற்றப்பட்ட குளிர்பானச் சந்தையில் கோகா கோலா, பெப்சிகோ நிறுவனங்களின் கூட்டுச் சந்தைப் பங்கு

இந்த மாற்றத்தை இந்தியத் தொலைத்தொடர்புத் துறையில் 2016ஆம் ஆண்டு ரிலையன்ஸ் ஜியோ ஏற்படுத்திய புரட்சியுடன் கோடக் அறிக்கை ஒப்பிட்டுள்ளது.

“இது குளிர்பானத் துறையின் ஜியோ தருணம்” என்று அந்த அறிக்கை குறிப்பிட்டுள்ளது.

ஜியோ நிறுவனம் தொலைத்தொடர்புச் சந்தையில் நுழைந்து இணையத் தரவுகளின் விலையைக் குறைத்தபோது, ஏற்கெனவே ஆதிக்கம் செலுத்திய நிறுவனங்கள் சந்தைப் பங்கை இழந்தன.

அதேபோன்று, இந்தியக் குளிர்பானச் சந்தையிலும் பெரிய நிறுவனங்கள் விற்பனை அளவை இழந்து வருகின்றன என்று அறிக்கை விளக்கியுள்ளது.

பொதுவாக உலகச் சந்தைகளில் இரு பெரிய நிறுவனங்கள் ஆதிக்கம் செலுத்தும்போது, அவற்றின் சந்தைப் பங்கு ஆண்டுக்கு ஒன்று அல்லது இரண்டு சதவீதத்துக்கு மேல் குறைவது அரிது.

ஆனால், ஓராண்டுக்கும் குறைவான காலத்தில் எட்டு சதவீதப் புள்ளிகள் அளவுக்கு ஏற்பட்டுள்ள இந்த மாற்றம், சந்தையின் கட்டமைப்பிலேயே ஏற்பட்டுள்ள குறிப்பிடத்தக்க மாற்றமாகும் என்று கோடக் அறிக்கை சுட்டிக்காட்டியுள்ளது.

நாளொன்றுக்கு 12 இலட்சம் போத்தல்கள் தயாரித்தும் போதவில்லை

லாஹோரி ஜீராவைத் தயாரிக்கும் ஆர்ச்சியன் ஃபுட்ஸ் (Archian Foods) நிறுவனத்தின் தலைமை நிர்வாக அதிகாரி சௌரப் முஞ்சால், அதிகரித்து வரும் தேவையைப் பூர்த்தி செய்வது தங்களுக்குப் பெரிய சவாலாக இருப்பதாகக் கூறுகிறார்.

“ஒவ்வோர் ஆண்டும் எமது தயாரிப்புகள் முழுமையாக விற்றுத் தீர்ந்துவிடுகின்றன. கடந்த ஆண்டு நாளொன்றுக்கு 12 இலட்சம் போத்தல்கள் தயாரிக்கும் அளவுக்கு உற்பத்தித் திறனை இரட்டிப்பாக்கினோம். இருந்தபோதிலும் தேவையைப் பூர்த்தி செய்ய முடியவில்லை” என்று அவர் பிபிசியிடம் தெரிவித்தார்.

இந்திய நுகர்வோர் மத்தியில் சீரகச் சோடாவுக்கு எவ்வளவு வரவேற்பு இருக்கிறது என்பதை இந்த நிலைமை வெளிப்படுத்துகிறது.

மேற்கத்திய குளிர்பானங்களுக்கு மாற்றாக இந்தியப் பாரம்பரியச் சுவைகள்

பல தசாப்தங்களாக இந்தியாவில் கோலா நிறுவனங்கள் வலுவான ஆதிக்கம் செலுத்தி வந்துள்ளன.

கோகா கோலா, பெப்சி போன்ற பானங்கள் வெறும் தாகம் தீர்க்கும் பொருட்களாக மட்டுமன்றி, நவீன வாழ்க்கை முறை மற்றும் சமூக அந்தஸ்தின் அடையாளங்களாகவும் விளம்பரப்படுத்தப்பட்டன.

விளம்பரப் பலகைகள், பொலிவுட் நட்சத்திரங்கள், கிரிக்கெட் போட்டிகள் ஆகியவற்றில் கோடிக்கணக்கான டொலர்களைச் செலவிட்டு, மேற்கத்திய குளிர்பானக் கலாசாரத்தை இந்திய நுகர்வோரிடம் இந்த நிறுவனங்கள் கொண்டு சென்றன.

ஆனால், இப்போது உள்நாட்டு நிறுவனங்கள் வேறொரு அணுகுமுறையைப் பின்பற்றுகின்றன.

சீரகம், பச்சை மாங்காய், கோகம் பழம், புளி போன்ற இந்தியர்களுக்குப் பரிச்சயமான சுவைகளை அடிப்படையாகக் கொண்டு குளிர்பானங்களைத் தயாரிக்கின்றன.

மலிவான விலை, திறமையான விநியோகம், உள்ளூர் மக்களின் விருப்பங்களைப் புரிந்துகொண்ட சந்தைப்படுத்தல் ஆகியவையும் அவற்றின் வளர்ச்சிக்கு உதவுகின்றன.

சௌரப் முஞ்சால் இதுகுறித்துக் கூறுகையில், இந்திய நுகர்வோர் நிறுவனங்கள் நீண்டகாலமாக இரண்டு வழிகளைப் பின்பற்றி வந்ததாகச் சுட்டிக்காட்டினார்.

ஒன்று, இந்தியப் பொருட்களை மேற்கத்தியமயமாக்குவது.

மற்றொன்று, மேற்கத்தியப் பொருட்களை இந்தியமயமாக்குவது.

ஆனால், லாஹோரி ஜீரா மூலம் இந்த அணுகுமுறையை மாற்ற விரும்புவதாக அவர் கூறுகிறார்.

அதனால்தான் அந்நிறுவனம் ‘அப்னா தேசி தண்டா’ (Apna Desi Thanda) என்ற விளம்பர வாசகத்தைப் பயன்படுத்துகிறது.

இதன் பொருள், ‘நமது சொந்த இந்தியக் குளிர்பானம்’ என்பதாகும்.

இதற்கிடையில், சீனி உட்கொள்ளலைக் குறைக்க விரும்பும் நுகர்வோரைக் கவரும் நோக்கில், ஹவுஸ் ஒஃப் பிந்து நிறுவனம் சீனி சேர்க்கப்படாத சீரகச் சோடாவையும் அண்மையில் அறிமுகப்படுத்தியுள்ளது.

சீரகச் சோடாவின் வளர்ச்சி எவ்வளவு தூரம் செல்லும்?

இந்த வெற்றிக்கு மத்தியிலும் சில முக்கியமான கேள்விகள் எழுகின்றன.

சீரகச் சோடாவுக்கான தற்போதைய வரவேற்பு நீண்டகாலம் தொடருமா?

கோகா கோலா, பெப்சி போன்ற பானங்களின் அளவுக்கு இதன் சந்தை வளருமா?

மும்பையிலுள்ள எஸ்.பி. ஜெயின் முகாமைத்துவக் கல்வி நிறுவனத்தின் பேராசிரியர் ராஜீவ் அகர்வால் இதுகுறித்துச் சந்தேகம் வெளியிட்டுள்ளார்.

பன்னாட்டு நிறுவனங்களுடன் போட்டியிடும் குடும்ப வர்த்தகங்களுக்கு ஆலோசனை வழங்கும் அவர் பிபிசியிடம் கூறுகையில்,

“சீரகச் சுவையுள்ள குளிர்பானச் சந்தை எவ்வளவு பெரிதாக வளர முடியும் என்பதே முக்கியமான கேள்வி. அது கோலா பானங்களின் சந்தை அளவுக்கு வளருமா என்பதில் எனக்குச் சந்தேகம் உள்ளது” என்றார்.

இந்தியச் சீரகச் சோடா நிறுவனங்கள் தமது வெற்றியைத் தக்கவைத்துக்கொள்ள வேண்டுமானால், பல பொருளாதாரச் சவால்களைச் சமாளிக்க வேண்டியிருக்கும் என்றும் ஆய்வாளர்கள் கூறுகின்றனர்.

ரூ.10 விலை: வெற்றிக்குக் காரணமும் எதிர்காலச் சவாலும்

இந்தியச் சீரகச் சோடா சந்தையில் பெரும்பாலான விற்பனை 10 ரூபாய் விலையிலான போத்தல்களிலிருந்தே கிடைக்கிறது.

இந்த மலிவான விலை, அதிக எண்ணிக்கையிலான நுகர்வோரை ஈர்த்துள்ளது.

ஆனால், அதே விலையைத் தொடர்ந்து பராமரிப்பது நிறுவனங்களுக்குச் சிரமமாக மாறக்கூடும்.

உலகளாவிய எரிசக்தி நெருக்கடியால் பிளாஸ்டிக், பொதியிடல் பொருட்கள், சீனி மற்றும் பிற மூலப்பொருட்களின் விலைகள் அதிகரித்து வருகின்றன.

ஏற்கெனவே குறைந்த இலாப விகிதத்தில் இயங்கும் நிறுவனங்களுக்கு இந்தச் செலவுகள் கூடுதல் அழுத்தத்தை ஏற்படுத்தலாம்.

விலையை அதிகரித்தால் விற்பனை குறையக்கூடும்.

விலையை மாற்றாமல் வைத்திருக்க விரும்பினால் போத்தல்களின் அளவைக் குறைக்க வேண்டிய நிலை ஏற்படலாம்.

சில ஆண்டுகளுக்கு முன்னர் கோலா நிறுவனங்களும் இதே உத்தியைப் பயன்படுத்தியிருந்தன.

எனவே, குறைந்த விலையில் அதிக விற்பனையைப் பெறும் தற்போதைய வர்த்தக முறை எவ்வளவு காலம் நீடிக்கும் என்பது முக்கியமான கேள்வியாக உள்ளது.

கோகா கோலாவின் எதிர்த்தாக்குதல்:

சீரகச் சோடா சந்தையில் உள்நாட்டு நிறுவனங்கள் மட்டும் போட்டியிடவில்லை.

பெரிய பன்னாட்டு நிறுவனங்களும் இந்தச் சந்தையின் வளர்ச்சியைக் கவனித்து வருகின்றன.

கோகா கோலா நிறுவனம் 1990களிலேயே சீரகச் சுவையுள்ள ‘ரிம்ஜிம்’ (Rimzim) என்ற பான வர்த்தக நாமத்தை வாங்கியிருந்தது.

தற்போது அந்தப் பானத்தின் சந்தை வாய்ப்புகளை விரிவுபடுத்தும் முயற்சியில் நிறுவனம் ஈடுபட்டுள்ளது.

கடந்த ஆண்டு ரிம்ஜிம் பானத்தின் உற்பத்தியை கோகா கோலா இரட்டிப்பாக்கியதாகத் தகவல்கள் தெரிவிக்கின்றன.

பேராசிரியர் அகர்வால் கூறுகையில், இந்தச் சந்தையில் போட்டி மிகவும் கடுமையாக இருப்பதாக எச்சரித்துள்ளார்.

பெரிய பன்னாட்டு நிறுவனங்களிடம் சிறந்த நிர்வாகக் கட்டமைப்புகள், உற்பத்தி நடைமுறைகள், விரிவான விநியோக வலையமைப்புகள், போத்தல்களில் பானங்களை நிரப்பும் வசதிகள் ஆகியவை ஏற்கெனவே உள்ளன.

அத்தகைய நிறுவனங்களுடன் தொடர்ந்து போட்டியிடுவதற்கு உள்நாட்டு நிறுவனங்கள் தமது உற்பத்தித் திறனையும் விநியோக அமைப்புகளையும் மேலும் வலுப்படுத்த வேண்டியிருக்கும்.

உலகச் சந்தையை நோக்கும் இந்தியச் சீரகச் சோடா:

சவால்கள் இருந்தாலும், லாஹோரி ஜீரா நிறுவனத்தின் எதிர்காலத் திட்டங்கள் இந்தியாவுடன் நின்றுவிடவில்லை.

எதிர்வரும் ஆண்டுகளில் உலகளாவிய குளிர்பானச் சந்தைக்குள் நுழைய சௌரப் முஞ்சால் திட்டமிட்டுள்ளார்.

இந்தியாவின் பாரம்பரியச் சுவைகள் உலக அளவில் அங்கீகாரம் பெற வேண்டும் என்பதே அவரது விருப்பம்.

“இந்தியச் சுவைகள் உலக அரங்கில் முக்கியத்துவம் பெற வேண்டும்” என்று அவர் கூறுகிறார்.

அவர் மேலும் தெரிவிக்கையில்,

“பல தலைமுறைகளாக நாம் உலகின் கோலா பானங்களைக் குடித்து வளர்ந்திருக்கிறோம். ஆனால், எதிர்காலத் தலைமுறையினர் இந்தியாவின் சீரகப் பானங்களைக் குடித்து வளர்வார்கள் என்று நான் நம்புகிறேன்” என்றார்.

ஒரு சமையலறைப் பரிசோதனை ஏற்படுத்திய சந்தை மாற்றம்;

இந்தியச் சீரகச் சோடாவின் வளர்ச்சி, ஒரு புதிய குளிர்பானத்தின் வெற்றியை மட்டும் எடுத்துக்காட்டவில்லை.

பாரம்பரியச் சுவைகளை அடிப்படையாகக் கொண்டு, சரியான விலையில், மக்களுக்குப் பிடித்தமான பொருட்களைத் தயாரித்தால் சிறிய உள்நாட்டு நிறுவனங்களாலும் உலகின் மிகப்பெரிய பன்னாட்டு நிறுவனங்களுக்குப் போட்டியாக வளர முடியும் என்பதை இந்த அனுபவம் காட்டுகிறது.

அதேநேரத்தில், ஒரு குறிப்பிட்ட சுவைக்கான சந்தை எவ்வளவு பெரிதாக வளர முடியும், மூலப்பொருட்களின் விலை உயர்வை நிறுவனங்கள் எப்படிச் சமாளிக்கும், பெரிய நிறுவனங்களின் போட்டியை எவ்வாறு எதிர்கொள்ளும் என்பன இன்னும் பதிலளிக்கப்பட வேண்டிய கேள்விகளாகவே உள்ளன.

இந்தியாவின் சீரகச் சோடா பானங்கள் உலகளாவிய கோலா சந்தையில் நிரந்தர இடத்தைப் பிடிக்குமா என்பதை எதிர்வரும் ஆண்டுகள்தான் தீர்மானிக்கும்.

மூலம்: பிபிசி

Leave a Reply

Your email address will not be published. Required fields are marked *